ای ٹی وی بھارت سے بات کرتے ہوئے خاتون کے وکیل راجدیپ لہیری نے کہا کہ 'ہائی کورٹ سے اس کیس کی فائل دینے کی گزارش کی گئی تھی جسے عدالت نے منظور کر لیا ہے۔'
انہوں نے کہا کہ انہیں امید ہے کہ عدالت ان کو انصاف دے گی۔
خیال رہے کہ رواں برس کے مئی میں ممبئی کی ایک خاتون اپنے شوہر کے ساتھ کشمیر سیروتفریح کے لیے گئی تھی۔
انہوں نے گاندربل میں آرمی لیفٹننٹ، جو خاتون کے شوہر کا دوست تھا، کے یہاں قیام کیا۔ خاتون نے لیفٹننٹ کرنل کے خلاف جسمانی طور پر ہراساں کرنے کا الزام عائد کیا اور اس کی آرمی اور مقامی پولیس کے پاس شکایت درج کی۔
کیس کی سماعت گاندربل کی ضلعی عدالت میں ہوئی جہاں جج نے پولیس کو ہدایت جاری کی کہ آرمی افسر کے خلاف ایف آئی ار درج کی جائے۔
لیکن آرمی افسر نے ہائی کورٹ سے رجوع کرکے ضلعی عدالت کی ہدایت پر حکم امتناعی دینے کی درخواست دی تھی جس کو عدالت نے منظور کیا۔
خاتون کے وکیل نے کہا کہ عدالت نے انہیں آج پیش ہونے کو کہا تھا جہاں انہوں نے کیس کی عرضی کی فائل دینے کی درخواست کی تھی۔
انہوں نے کہا کہ عدالت نے ان کی درخواست منظور کرکے عرضی فائل دینے کے احکامات جاری کئے اور کیس کی اگلی سماعت 30 اگست کو ہوگی۔
