عالمی مہلک وبا کورونا وائرس کے پھلاؤ کا سلسلہ اب بھی جاری ہے اسی ضمن میں جموں کشمیر کے ضلع اننت ناگ میں چوبیس سی آر پی ایف جوانوں سمیت 31 افراد کا کووڈ-19 ٹیسٹ مثبت پایا گیا ہے۔
اس کے ساتھ ہی ضلع اننت ناگ میں کوروناوائرس کے مریضوں کی مجموعی تعداد 504 تک پہنچ گئی ہے، جبکہ 12 جون تک 338 افراد صحتیاب ہوچکے ہیں اور ابھی تک پانچ افراد کی کورونا کی وجہ سے موت ہوچکی ہے۔
ضلع اننت ناگ میں 24 سی آر پی ایف اہلکاروں کا کووڈ-19 ٹیسٹ مثبت پایا گیا ہے، جبکہ ضلع اننت ناگ کے اُرنہال میں قائم 94 بٹالین سے وابستہ سی آر پی ایف کے جوان جن کی عمر 24 سے 58 برس کے درمیان ہے۔
واضح رہے کہ مذکورہ جوانوں میں سے چند روز قبل جانچ کے نمونے حاصل کیے گئے تھے، تاہم آج ان کی رپورٹ مثبت آئی ہے، جس کے بعد جوانوں کو قرنطینہ میں رکھا گیا ہے۔
اننت ناگ کے جن علاقوں میں کورونا وائرس کی تصدیق ہوئی ہے اُن میں، ہلر کوکرناگ، بٹکوٹ، پہلگام، سلیگام، گوہن، پہلگام، اگجن دیالگام، ہاکورہ اور شمسی پورہ شامل ہیں۔
