سرینگر: مرحوم شیر کشمیرشیخ محمد عبداللہ کے مزار پر پارٹی کے سنیئر لیڈروں کی قیادت میں کارکنوں نے حاضری دی اور بابائے قوم کو یاد کرتے ہوئے انکے حق میں فاتحہ خوانی ادا کی۔شیر کشمیر کو خراج عقیدت پیش کرتے ہوئے پارٹی کی سربراہ بیگم خالدہ شاہ نے کہا کہ شیر کشمیر کے اندر موجود سیکولرازم اور رواداری کا جذبہ اس ماحول کا مجموعی اثر تھا جس نے نسل در نسل اس کی نفسیات کو ٹھیک کیا ہے۔
بیگم خالدہ شاہ نے کہا کہ عوامی حقوق کی بحالی کے لیے ان کی سیاسی جدوجہد خصوصی تھی اورایک عوامی تحریک کے منتظم شیخ صاحب کی جدوجہد کا مقصد کبھی بھی کسی عقیدے کے خاص پیروکاروں کی تکالیف کو دور کرنا نہیں تھا۔ مرحوم شیخ محمد عبداللہ نے انتھک محنت کی اورجموں و کشمیر میں رہنے والی پوری انسانیت کو انتہائی غربت سے نجات دلانے کے لیے قید و بند کی صعوبتیں جھیلیں۔
اس دوران عوامی نیشنل کانفرنس کے سنیئر نائب صدر مظفر شاہ نے مرحوم شیخ محمد عبداللہ کو انکی برسی پر یاد کرتے ہوئے کہا کہ شیر کشمیر کا تعلق عظیم شخصیات کے اس شاندار قبیلے سے تھا۔ جس نے تاریخ کی دھارا بدل دی انہوں نے کہا کہ مرحوم نے لوگوں کو ان کے علاقائی اور مذہبی وابستگیوں سے قطع نظر مساوی حقوق فراہم کیں اور جموں و کشمیر میں نچلی سطح کی جمہوریت کا آغاز کیا ۔
یہ بھی پڑھیں:سوشل میڈیا پر منفی پروپیگنڈہ سے باز رہیں: ایس ایس پی اونتی پورہ
شاہ نے کہا کہ کاشتکاروں کیلئے زرعی اصلاحات، سنگل لائن ایڈمنسٹریشن، بڑی زمینی جائدادوں کا خاتمہ، قرضوں کا خاتمہ، عالمی بالغ حق رائے دہی، صنفی غیر جانبدارانہ تعلیم نے محکوم، پسماندہ اور بد حال لوگوں کی مدد کی۔انہوں نے کہا کہ مرحوم کی طرف سے اٹھائے گئے عوام دوست اقدامات نے نہ صرف کشمیر بلکہ جموں و کشمیر کے تمام خطوں میں رہنے والے لوگوں کو مدد فراہم کی۔
