جنوبی کشمیر کے ضلع اننت ناگ کے ہاکھورہ اور بٹہ پورہ علاقوں کے لوگوں نے محکمہ جل شکتی پر الزام عائد کرتے ہوئے کہا کہ اُن کے نلوں میں پینے کے صاف پانی کی قلت برسوں سے پائی جا رہی ہے جس کی وجہ سے لوگ برینگی نالے کا گندہ پانی پینے پر مجبور ہو رہے ہیں۔
نتیجتاً لوگ مختلف امراض میں مبتلا ہو رہے ہیں۔ لوگوں کے مطابق ہفتے میں صرف دو یا تین بار اُن کے نلوں میں پانی آتا ہے جبکہ باقی کے 5 روز اُنہیں نالہ برینگی سے اپنی پیاس بُھجانی پڑتی ہے۔
اُن کا کہنا ہے کہ اُنہیں برسوں سے اس پریشانی کا سامنا درپیش ہے۔ اگرچہ اُنہوں نے کئی بار پانی کے مسئلے کو لےکر کئی دروازے کھٹکھٹائے۔ تاہم کسی نے ان کی فریاد نہیں سنی اور ہر بار ان کی آواز صدا بصحرا ثابت ہوئی۔
لوگوں نے انتظامیہ سے پُرزور گزارش کی ہے کہ اس مسئلے کی طرف جلد از جلد اپنی توجہ مرکوز کریں تاکہ ان کی مشکلات کا ازالہ ہو سکے۔
