نمائندے کے مطابق ضلع انتظامیہ کی ہدایت پر اے ڈی سی اونتی پورہ اور محکمہ جیالوجی اینڈ مائیننگ کی ٹیم نے مشترکہ طور اونتی پورہ میں دریائے جہلم سے غیر قانونی طور ریت نکالنے کے خلاف مہم چلائی، اور چھاپے کے دوران ایک جے سی بی (JCB)، ایک ٹپر گاڑی اور ذخیرہ کی گئی ریت کو بھی ضبط کیا گیا۔
اس ضمن میں انتظامیہ نے عوام کو انتباہ کیا ہے کہ وہ غیر قانونی طور جہلم سے ریت نہ نکالیں کیونکہ اس وجہ سے جہلم کے باندھ ٹوٹنے کا خطرہ لاحق رہتا ہے اور رہائشی علاقوں کے ڈوبنے کا بھی خطرہ لاحق رہتا ہے۔
قابل ذکر ہے کہ مرکزی سرکار کی جانب سے دفعہ 370کی منسوخی اور جموں و کشمیر کو دو مرکزی زیر انتظام والے علاقوں میں تقسیم کرنے کے بعد وادی میں حالات دگر گوں ہیں، اور ان نامساعد حالات کا فائدہ اٹھاتے ہوئے جہلم و دیگر آبی ذخائر سے غیر قانونی طور ریت اور باجری وغیرہ نکلانے کا سلسلہ تیز ہو گیا تھا، وہیں آبی پناہ گاہوں اور قومی شاہراہ کے ارد گرد اور دیگر مقامات پر جہاں تعمیرات کا کام ممنوع ہے وہاں بھی نامساعد حالات کا فائدہ اٹھاتے ہوئے غیر قانونی تعمیرات کا کام کاج بھی شد و مد سے جاری ہے۔
