نئی دہلی: ہماچل پردیش کے منڈی میں واقع انڈین انسٹی ٹیوٹ آف ٹیکنالوجی (IIT) کے ڈائریکٹر لکشمی دھر بہیرا نے طلباء سے گوشت نہ کھانے کا عہد لینے کی اپیل کرتے ہوئے دعویٰ کیا کہ ریاست میں جانوروں پر ظلم کی وجہ سے مٹی کے تودے گرنے اور بادل پھٹنے کے واقعات ہو رہے ہیں۔ ان کے اس بیان نے ایک نیا تنازعہ کھڑا کر دیا ہے۔ وائرل ویڈیو میں طالب علموں کو مخاطب کرتے ہوئے بہیرا نے کہہ رہے ہیں کہ اگر ہم ایسا کرتے رہے تو ہماچل پردیش میں صورت حال مزید خراب ہوجائے گی۔ آپ وہاں معصوم جانوروں کو مار رہے ہیں۔ اس کا ماحولیاتی انحطاط کے ساتھ ایک علامتی تعلق بھی ہے، جسے آپ ابھی نہیں دیکھ سکتے لیکن یہ موجود ہے۔"
بہیرا ویڈیو میں مزید کہہ رہے ہیں کہ ریاست میں بار بار لینڈ سلائیڈنگ، بادل پھٹنا اور بہت سی دوسری چیزیں ہو رہی ہیں، یہ سب جانوروں کے ساتھ ہونے والے ظلم کے اثرات ہیں، لوگ گوشت کھاتے ہیں۔ انھوں نے آگے کہا کہ اچھا انسان بننے کے لیے کیا کرنا چاہیے؟ گوشت کھانا بند کرو۔ انہوں نے طلباء سے کہا کہ وہ گوشت نہ کھانے کا عہد کریں۔ کچھ انٹرنیٹ صارفین نے ان کے بیان پر شدید تنقید کی ہے لیکن اس تنازعہ پر بہیرا کی طرف سے کوئی ردعمل سامنے نہیں آیا ہے۔
قابل ذکر ہے کہ یہ پہلا موقع نہیں ہے جب بہیرا کے تبصروں پر تنازعہ کھڑا ہوا ہو۔ گزشتہ برس وہ اس وقت خبروں میں آئے تھے جب انھوں نے منتر پڑھ کر اپنے ایک دوست اور اس کے خاندان کو بری روحوں سے نجات دلانے کا دعویٰ کیا تھا۔
