بھارتی ریاست ہریانہ کے میوات ضلع میں پانی کی قلت کی وجہ سے کسانوں کو سخت مشکلات کا سامنا کرنا پڑ رہا ہے۔ میوات میں اس وقت گیہوں کی فصل تیار ہے تاہم پانی کی کمی کی وجہ سے فصل تباہ ہورہی ہے۔
لوگوں کی پریشانی کو دیکھتے ہوئے رکن اسمبلی آفتاب احمد نے ایڈیشنل ڈپٹی کمشنر وویک پدم سنگھ سے ملاقات کی اور اُنہیں موجودہ حالات سے واقف کرایا۔ انہوں نے اس موقع پر وزیر اعلی منوہر لال کھٹر کو ایک میمورنڈم بھی روانہ کیا۔
کسانوں کا کہنا ہے کہ میوات کی نہریں سُوکھ چُکی ہیں جس کی وجہ سے فصلیں تباہ ہورہیں ہیں۔ انہوں نے کہا افسران کی لاپرواہی کی وجہ سے سینکڑوں کسانوں کی محنت ضائع ہو رہی ہے۔
ادھر رکن اسمبلی آفتاب احمد نے اس معاملہ میں بدعنوانی کا شُبہ بھی ظاہر کیا۔
ایڈیشنل ڈپٹی کمشنر نے وفد کو یقین دلایا کہ ان کی مشکلات کو حل کیا جائے گا اور بہت جلد نہروں میں پانی کو چھوڑا جائے گا۔
