در اصل آج ہریانہ کے ضلع پلول میں کسان مہاپنچایت کا انعقاد کرنے والے ہیں جس کے مد نظر فرید آباد پولیس الرٹ ہوگئی ہے۔
حالانکہ فرید آباد کے بدر پور بارڈر پر حالات عام دنوں کی طرح ہی ہیں لیکن آج یہاں بھاری تعداد میں پولیس فورس کو تعینات کیا گیا ہے اور اس کی سب سے اہم وجہ یہ ہے کہ نئے زرعی قوانین کی مخالفت میں پلول میں ہونے والی کسانوں کی میٹنگ کو مانا جارہا ہے۔ اس موقع پر کسی بھی ناخوشگوار واقعے سے نمٹنے کے لیے ہی پولیس انتطامیہ نے یہ قدم اٹھایا ہے۔
واضح رہے کہ گزشتہ دو مہینوں سے بدر پور سرحد پر ایک بھی پولیس اہلکار تعینات نہیں کیا گیا تھا۔
بدر پور سرحد کا جائزہ لینے پہنچے ایس پی موجی رام نے بتایا کہ فرید آباد میں حالات پوری طرح سے معمول پر ہیں، یہاں کے کسان بہت اچھے ہیں اور وہ سڑک پر نہیں اتریں گے۔ اس کے ساتھ ہی انھوں نے یہ بھی کہا کہ ضلع فرید آباد پولیس کسی بھی طرح کی صورت حال سے نمٹنے کے لیے تیار ہے۔
خیال رہے کہ فرید آباد بارڈر پر حالات ابھی تک معمول پر ہیں لیکن پولیس انتظامیہ مستعد ہو چکا ہے اور سرحد پر آنے جانے والوں کو کسی بھی طرح کی کوئی پریشانی نہ ہو، اس کے لیے پولیس انتظامیہ پوری کوشش کر رہا ہے۔
