ہریانہ کے وزیر اعلیٰ منوہر لال کھٹر نے کہا ہے کہ ریاست میں ای گاڑیوں کو فروغ دینے کے لیے ریاستی حکومت آغاز میں ای وہیکلز خریدنے والوں کو سبسڈی دے گی۔ حکومت نے مقررہ مدت سے پرانی گاڑیوں کو این سی آر ریجن میں بند کرنے کے لیے وہیکل اسکریپ پالیسی بھی بنائی ہے۔
وزیراعلیٰ آج 'ورلڈ کار فری ڈے' کے موقع پر یہاں سول سیکرٹریٹ میں ای گاڑیوں پر آگاہی نمائش کا افتتاح کرنے کے بعد میڈیا کے سوالات کا جواب دے رہے تھے۔ انہوں نے کہا کہ گاڑیوں کی بڑھتی ہوئی تعداد کی وجہ سے ماحول آلودہ ہو رہا ہے۔ لوگوں نے گاڑیوں کو اسٹیٹس سمبل سمجھ لیا ہے جس کی وجہ سے گھر اوردفتر قریب ہوتے ہوئے بھی ملازمین اور افسران گاڑیاں استعمال کرتے ہیں۔
انہوں نے 'ورلڈ کار فری ڈے' کے موقع پر لوگوں کو کار پولین سسٹم اختیار کرنے یا قریبی جگہ کے لئے پیدل یا سائیکل سے جانے کے لئے عہد کرنے کی اپیل کی۔ وزیراعلیٰ نے کہا کہ فضا میں آکسیجن کی وافر مقدار ہونا ضروری ہے لیکن آلودگی کی وجہ سے ماحول میں کاربن ڈائی آکسائڈ کی مقدار بڑھ رہی ہے۔ ریاست میں آکسیجن لگانےکو فرو غ دیا جارہا ہے۔ محکمہ جنگلات کی جانب سے تقریباتین کروڑ پودے بھی لگائے جا رہے ہیں۔ طلباء کو شجرکاری کی طرف راغب کیا جا رہا ہے۔
یہ بھی پڑھیں: آرگینک کاشت سے کسان لاکھوں کما رہے ہیں
انہوں نے بتایا کہ آلودگی کو کم کرنے کی سمت میں اقدامات کرتے ہوئے اب تک گروگرام میں سی این جی بسوں کی حوصلہ افزائی کی جا رہی تھی، لیکن اب وہاں بھی ای بسیں اور ای آٹو چلانے پر زور دیا جائے گا۔
یو این آئی
