میوات:زراعت سےمتعلق بل پر کانگریس کا احتجاج

مرکزی حکومت کی جانب سے کسانوں کے لیے بنائے جانے والے نئے بل پر مختلف ریاستوں میں شدید نقطہ چینی کی جا رہی ہے۔

ریاست ہریانہ کے ضلع نوح کے علاقہ میوات یوتھ کانگریس نے ایک پریس کانفرنس کا انعقاد کیا جس میں حکومت پر کسانوں کے ساتھ ظلم کرنے کا سنگین الزام عائد کیا۔

یوتھ کانگریس کے ریاستی سیکریٹری روہت ناگر اور ضلع یوتھ کانگریس کے صدر ایڈووکیٹ مبارک خان ٹونکی نے اس پریس کانفرنس کی قیادت کی۔

روہت ناگر نے صحافیوں سے مخاطب ہوتے ہوئے کہا کہ حکومت کی طرف سے لائے گئے نئے آرڈیننس کسان مخالف ہیں۔ اور یہ قوانین زراعت کو بھی نجکاری کی طرف لے جانے کا پہلا قدم ہے۔

انہوں نے کہا کہ وزیراعظم نریندر مودی کہتے ہیں کہ ہم نے ان چھ برسوں میں کسانوں کے لئے وہ کیا، جو کسی نے نہیں کیا۔

کانگریس یوتھ کے ریاستی سیکریٹری روہت ناگر نے کہا کہ ہم بھی اس سے اتفاق کرتے ہیں کہ نریندر مودی سرکار نے وہ تمام ظلم کسان پر کیے ہیں جو آج تک کسی نے نہیں کئے۔کسان آج سب سے زیادہ خودکشی کرنے پر مجبور ہے۔

غور طلب ہے کہ حکومت کی طرف سے کسانوں کے حوالے سے آرڈیننس لائے جانے کے بعد ہریانہ میں احتجاج شروع ہوگئے ہیں ۔

اس کے بعد ہریانہ کے پیپلی میں کسانوں پر لاٹھی چارج کیا گیا اور انہیں بری طرح سے مارا پیٹا گیا۔

ان دنوں ریاست ہریانہ میں سیاست اسی پر مرکوز ہو کر رہ گئی ہے۔