پارسی برادری سے تعلق رکھنے والے بی این دستور ریاست گجرات میں رہتے ہیں جو بے پناہ صلاحیتوں کے سبب پوری دنیا میں اپنی الگ پہچان رکھتے ہیں۔ بی این دستور رہتے تو احمدآباد میں ہیں لیکن دنیا بھر کے مارکیٹنگ ورکشاپ، پروگرام اور سیمینار میں حصہ لیتے رہتے ہیں۔ بی این دستور نے ای ٹی وی بھارت سے گفتگو کرتے ہوئے کئی باتوں کا خلاصہ کیا ہے۔
بی این دستور کا اصل نام بہرام گور نوروجی دستور ہے لیکن وہ بی این دستور کے نام سے مشہور ہیں۔ ان کی عمر 89 برس ہے لیکن وہ اب بھی چستی و پھرتی سے کام کرتے ہیں۔
بی این دستور ایک مصنف، مارکیٹنگ مینجمنٹ ایکسپرٹ، مینجمنٹ کنسلٹنٹ، کالم نگار، مزاح نگار، ماہر تعلیم اور مترجم ہیں۔
وہ گزشتہ 50 برسوں سے تصنیفی خدمات و مینجمنٹ پر کام کررہے ہیں۔ انگریزی و گجراتی زبانوں میں آپ نے خوب لکھا ہے۔
انہوں نے اب تک 120 سے زائد کتابیں تصنیف کی ہیں۔ جن میں خاص طور سے مارکیٹنگ، ایتھلیٹکس، مینجمنٹ، سلیف ڈیولمپنٹ، سنسکرت، بھگوت گیتا، جین، صوفی اِزم، اموشنل انٹیلیجنس، اسٹریس مینجمنٹ اور شیخ سعدی کی کتاب گلستان سعدی کا گجراتی ترجمہ کی کتابیں شامل ہیں۔ بہت سے اخبارات کے لیے انہوں نے کالم بھی لکھا ہے۔
بی این دستور کی خدمات کا اعتراف کرتے ہوئے گجرات ساہتیہ اکادمی کی جانب سے انہیں جیوتیندر دوے ایوارڈ سے بھی نوازا جاچکا تھا جبکہ ایک امریکی یونیورسٹی سے بھی وہ ایوارڈ سے سرفراز کئے جاچکے ہیں۔
اس تعلق سے بی این دستور نے ای ٹی وی بھارت سے گفتگو کے دوران بتایا کہ ' سنہ 1989 میں وہ حادثے کا شکار ہوگئے تھے جس کے بعد وہ چلنے کے بھی قاصر ہوگئے اور اسی وقت انہوں نے لکھنے کی شروعات کی اور آج وہ 120 سے زائد کتابوں کے مصنف ہیں۔