گزشتہ روز وجے روپانی نے گجرات کے وزیراعلیٰ کے عہدے سے استعفیٰ دے دیا ہے جس کے ریاست کی باگ ڈور کس کے ہاتھوں میں جائے گی اس پر بحث جاری ہے اور آج گجرات بی جے پی دفتر میں ارکان اسمبلی اور مرکزی وزراء کی موجودگی میں میٹنگ ہوگی اور نئے وزیراعلیٰ کے نام کا اعلان کیا جائے گا۔
گجرات کے نئے وزیراعلیٰ کے طور پر نتن پٹیل، گوردھن جافڑیا، سی آر پاٹل، پرفل پٹیل، جیش رادیا اور منسُکھ مانڈویا کے نام زیر بحث ہیں۔ اس کے علاوہ مرکزی وزیر پرشوتم روپالا، گنپت وساواوا کے نام بھی بطور وزیر اعلیٰ غور کئے جاسکتے ہیں۔
بتایا جا رہا ہے کہ آئندہ دو دنوں میں نئے وزیراعلیٰ کی حلف برداری ہوگی اور اسی کے ساتھ نئی کابینہ تشکیل دی جائے گی۔
کابینہ کے تعلق سے کہا جا رہا ہے کہ وجے روپانی کی کابینہ میں کچھ رد و بدل کئے جا سکتے ہیں اور کچھ وزراء کی چھُٹی بھی ہوسکتی ہے اس کے علاوہ آئندہ برس ہونے والے اسمبلی انتخابات کو ذہن میں رکھتے ہوئے کابینہ تشکیل دی جائے گی تاکہ رائے دہندگان کو اپنی جانب راغب کیا جا سکے۔
ذرائع کے مطابق بی جے پی نے 2022 کے اسمبلی انتخابات کے پیش نظر سروے میں وزراء کی کارکردگی کی کا جائزہ لیا تھا جس میں کچھ وزراء کی کارکردگی تسلی بخش نہیں پائی گئی اور کہا جا رہا ہے کہ اسی بنیاد پر کابینہ میں تبدیلی کی جاسکتی ہے۔
سیاسی حلقوں میں جاری بحث کے مطابق گجرات میں اتر پردیش کی طرح دو نائب نائب وزیراعلیٰ کا فارمولا اختیار کرنے کا امکان ہے اور سیاسی ماہرین کے مطابق ایک نائب وزیراعلیٰ اوبی سی اور دوسرا قبائلی ذات سے ہوسکتا ہے خاص طور پر ایک نائب وزیراعلیٰ کو جنوب مشرقی گجرات سے لیا جا سکتا۔
