ریاست گجرات کے شہر احمدآباد میں ای ٹی وی بھارت نے شاہ عالم درگاہ کے باہر سے ماحول کا جائزہ لیا تو پتا چلا کہ جب سے اس لاک ڈاؤن میں رعایتیں ملی ہیں تب سے بڑی تعداد میں زائرین عقیدت شاہ عالم درگاہ پر پہنچ رہے ہیں۔ لیکن درگاہ کے دروازے بند ہونے کی وجہ سے باہر سے ہی دعائیں مانگ کر چلے جا رہے ہیں اور دروازہ کھلنے کا انتظار کر رہے ہیں۔
اس تعلق سے ایک عقیدت مند رشید کا کہنا ہے کہ لاک ڈاؤن کی وجہ سے پورے ملک کو بند کر دیا گیا تھا۔ ایسے میں شاہ عالم کے درگاہ کے دروازے بھی پہلی بار بند نظر آئے۔ اب باہر نکلنے کی چھوٹ ملی ہے تو ہم درگاہ کا دیدار کرنے پہنچے ہیں اور ہم چاہتے ہیں کہ جلد از جلد درگاہوں میں جانے کی ہمیں اجازت مل جائے۔
ایک اور عقیدت مند نے کہا کہ ہم شاہ عالم درگاہ پر پہنچے ہیں باہر سے دعائیں مانگی ہیں۔ ہمیں خوشی ہے کہ مساجد اور درگاہوں کے دروازے کھلنے والے ہیں۔ حکومت کی گائیڈ لائن کے مطابق مساجد و درگاہوں میں عقیدت مندوں کے لیے انتظام کیا جاے گا۔ نماز سماجی فاصلوں کے ساتھ پڑھی جائے گی اور ہم بھی ماسک و سینیٹائزر کا استعمال کرتے ہوئے درگاہوں میں قدم رکھیں گے۔ ہم دعا کرتے ہیں کہ دنیا سے کورونا کا خاتمہ جلد سے جلد ہو۔
