ریاست گجرات کے ضلع سورت میں ایک والد نے اپنے دو ماہ کے بیٹے کو چاند پر ایک ایکڑ کی زمین تحفہ کے طور پر دی ہے۔
سورت کے سرتھانہ علاقے میں رہنے والے وجے کتھوریا نے اپنے دو ماہ کے بیٹے نتیہ کو ایک انمول تحفہ دینے کے لیے چاند پر ایک زمین خریدی ہے۔وجے کانچ کے کاروباری ہیں۔ وجے کا تعلق سوراشٹر سے ہے لیکن فی الحال وہ سورت کے سرتھانہ علاقہ میں رہائش پذیر ہیں۔
وجے نے چاند پر زمین خریدنے کے لیے نیویارک انٹرنیشنل لونر لینڈ رجسٹری کمپنی کو ایک ای میل بھیجا تھا، اب اس درخواست کو کمپنی نے منظور کر لیا ہے۔
وجے کتھوریا کے گھر میں دو ماہ قبل ہی نتیہ کی پیدائش ہوئی تھی۔ بیٹے کی پیدائش کے وقت ہی وجے کتھوریا نے سوچ لیا تھا کہ وہ اپنے بیٹے کو کچھ قیمتی اور خاص تحفہ دیں گے جس کے بعد وجے نے نیویارک انٹرنیشنل لونر لینڈ رجسٹری نامی کمپنی سے رابطہ کیا اور 13 مارچ کو چاند پر ایک زمین خریدنے کے لیے آن لائن درخواست داخل کی۔ کمپنی نے اب وجے کی اس درخواست کو قبول کر کے تمام قانونی کارروائی مکمل کر لی ہے اور وجے کتھوریا کو زمین خریدنے کی منظوری دینے کا ایک ای میل بھی کیا ہے۔ کمپنی کی جانب سے انہیں زمین خریدنے سے متعلق تمام کاغذات بھیجے گئے ہیں۔
واضح رہے کہ وجے کتھوریا چاند پر زمین خریدنے والے پہلے کاروباری ہیں اور نتیہ شائد دنیا کا سب سے کم عمر بچہ ہے جس کے نام پر چاند پر اپنی زمین ہے۔
