راہل گاندھی کو ضمانت، کہا 'میں مجرم نہیں'

کانگریس کے قومی صدر راہل گاندھی کو احمدآباد کی میٹروپولیٹن کورٹ نے ہتک عزت کے مقدمے میں پندرہ ہزار روپے کے بانڈ پر ضمانت دے دی ہے۔

نوٹ بندی کے دوران راہل گاندھی نے اے ڈی سی بی نامی بینک پر 745 کروڑ روپے کے کالے دھن کو سفید کرنے کا الزام لگایا تھا۔ جس کے بعد بینک کے چیئرمین اجے پٹیل نے راہل گاندھی کے خلاف عدالت میں ہتک عزت مقدمہ دائر کیا تھا۔

دوران سماعت معزز جج نے راہل گاندھی سے پوچھا کہ، ' کیا آپ اپنے جرم کا اقرار کرتے ہیں؟'، تو راہل نے جواب دیا کہ ' میں کوئی مجرم نہیں ہوں'۔

خیال رہے کہ گذشتہ برس راہل گاندھی اور کانگریس ترجمان رندیپ سرجے والا نے دعوی کیا تھا کہ احمدآباد ڈسٹرکٹ کوآپریٹیو بینک کالے دھن کو سفید کرنے کے گھناونے کام میں ملوث ہے۔

انہوں نے الزام لگایا تھا کہ 8 نومبر 2016 کو نوٹ بندی کے بعد محض پانچ دنوں میں بینک نے تقریباً 745 کروڑ روپے کو سفید کیا تھا۔