ریاست گجرات میں کورونا وائرس کا قہر مسلسل جاری ہے۔ اس پر قابو پانے کے لیے حکومت متعدد اقدامات کر رہی ہے لیکن اس کے باوجود کورونا کے معاملے میں ہر روز اضافہ ہورہا ہے، جس کو دیکھتے ہوئے گجرات میں ہونے والے بلدیاتی انتخابات کو الیکشن کمیشن نے 3 ماہ تک کے لئے ملتوی کردیا ہے ۔
اطلاعات کے مطابق گجرات کے 31 پنچایت اور 241 تعلقہ پنچایتوں کے ساتھ چھ میونسپل کارپوریشن اور 55 نگر پالیکا کی مدت پوری ہونے والی ہے۔ جس کے لیے قیاسآرائی کی جارہی تھی کہ نومبر یا دسمبر ماہ میں ان سیٹوں پر انتخابات ہوں گے۔
لیکن گجرات میں کورونا کیس میں ہورہے اضافے کے سبب الیکشن کمیشن نے ایک نوٹیفیکیشن جاری کیا ہے جس میں بلدیاتی انتخابات کو 3 ماہ تک کے لئے ملتوی کرنے کا اعلان کیا ہے۔ اور کہا ہے کہ 3 ماہ کے بعد کورونا کی صورت حال کا جائزہ لینے کے بعد انتخابات کرانے کا فیصلہ کیا جائے گا۔
واضح رہے کہ گجرات کے بلدیاتی انتخابات کو ملتوی کرنے کے لیے گزشتہ دنوں رکن اسمبلی غیاث الدین نے گجرات ہائی کورٹ میں پٹیشن بھی داخل کی تھی۔ اور اب الیکشن کمیشن کی جانب سے 3 ماہ تک انتخابات ملتوی ہونے پر لوگوں میں خوشی کا ماحول ہے۔
