گجرات کی چھ میونسپل کارپوریشن کے لئے ووٹنگ جاری ہے۔ اس دوران کثیر تعداد میں عوام ووٹنگ کرنے پولنگ مراکز پر پہنچ رہے ہیں۔ ضلع احمدآباد کے جمال پور اور کھاڑیہ کے رکن اسمبلی عمران کھیڑا والا نے بھی احمدآباد کے جمالپور گجراتی اسکول نمبر 9،10 میں اپنے حق رائے دہی کا استعمال کیا۔
اس موقع پر عمران کھیڑا والا نے ای ٹی وی بھارت سے بات چیت کرتے ہوئے کہا کہ جمال پور کے عوام کافی سمجھدار ہیں۔ وہ ہمیشہ سے کانگریس کو ووٹ کرتے آئے ہیں اور اس بار بھی جمالپور سے کانگریس کے امیدوار جیت حاصل کریں گے۔
انہوں نے کہا کہ کانگریس پارٹی کے امیدوار اپنے اپنے علاقوں کے تمام مسائل کو دور کریں گے۔ لوگ کافی جوش و خروش کے ساتھ اپنے حق رائے دہی کا استعمال کر رہے ہیں اور ہمیں عوام پر مکمل اعتماد ہے۔
انہوں نے مزید کہا کہ آل انڈیا مجلس اتحاد المسلمین سے کانگریس کے ووٹ بینک پر اثر نہیں پڑے گا۔ انہوں نے ایم آئی ایم کو برساتی مینڈک سے تعبیر کرتے ہوئے کہا کہ جو الیکشن کے وقت نظر آتے ہیں اور الیکشن ختم ہوتے ہی روانہ ہو جائیں گے۔ حیدرآباد سے ایم آئی ایم کی جو ٹیم آئی ہے وہ بھی 23 فروری کو واپس چلی جائے گی۔ ہمیں عوام کی پوری حمایت حاصل ہے اور ہم جیت کر دکھائیں گے۔'
