نیشنل کرائم ریکارڈ بیورو ہر سال ملک کی مختلف ریاستوں کے پولیس رجسٹر میں درج جرائم کی تفصیلات شائع کرتا ہے۔ اسی طرح حال ہی میں ایک ایسی رپورٹ اس نے شائع کی جس نے گجرات میں تہلکہ مچا دیا۔ این سی آر بی نے اپنی رپورٹ میں نے بتایا کہ گجرات سے گذشتہ پانچ برسوں میں 41,621 خواتین لاپتہ ہو چکی ہیں۔
یہ رپورٹ سوشل میڈیا پر خوب وائرل ہوئی اور سوشل میڈیا پر لوگوں نے حکومت اور انتظامیہ پر طنزیہ و تبصرے کیے اور تحریریں لکھیں، جس کے بعد گجرات پولیس نے فوری طور پر اس معاملے کو سنجیدگی سے لیتے ہوئے ایک ایک بیان جاری کیا جس میں گجرات پولیس نے دعویٰ کیا کہ نیشنل کرائم ریکارڈ بیورو نے جو رپورٹ شائع کی ہے وہ رپورٹ نامکمل اور گمراہ کن ہیں۔
گجرات پولیس کا دعویٰ ہے کہ سال 2016 سے 2020 پانچ سالہ مدت کے دوران گجرات سے لاپتہ ہوئیں 41621 خواتین میں سے39497 یعنی 94.90 فیصد خواتین بازیاب کر لی گئی ہیں اور وہ اپنے خاندانوں سے واپس مل چکی ہیں۔ واضح رہے کہ گجرات سے پانچ برسوں کے اندر 41621 خواتین کی گمشدگی کے عدادو شمار کرائم ریکارڈ بیورو کے ذریعے شائع کئے گئے ہیں اور این سی آر بی کے پورٹل پر ان کی تصدیق بھی کی جا چکی ہے۔
