ضلع کلیکٹر روی شنکر نے یو این آئی کو بتایا کہ گرو گووند سنگھ اسپتال یا جی جی اسپتال میں آگ شارٹ سرکٹ کے سبب لگی تھی۔ دوپہر قریب پونے تین بجے لگی آگ کو تقریباً ایک گھنٹے کی مشقت کے بعد بجھا دیا گیا۔ اس میں 09 غیر کورونا مریض داخل تھے جن میں سے تین وینٹیلیٹر پر تھے۔
اسپتال کی ساخت سے اچھی طرح واقف مقامی میونسپل کے چیف فائر افسر بشنوئی کی سوجھ بوجھ سے تمام مریضوں کو بحفاظت نکال لیا گیا۔ وینٹیلیٹر پر جو مریض تھے انھیں بغیر اس سے ہٹائے ہی محفوظ باہر نکال لیا گیا۔ آئی سی یو کے اکوپمینٹ اور وارڈ پوری طرح خاک ہو گیا۔ اس دوران کوئی بھی اسپتال اہلکار یا فائر برگیڈ اہلکار زخمی نہیں ہوا۔ انہوں نے بتایا کہ بچائے گئے مریضوں کو دوسرے وارڈ میں منتقل کر دیا گیا۔ وہ کورونا متاثر نہیں ہے۔
روی شنکر نے آئی سی یو کی ساخت میں انجینیئرنگ سے متعلق خامی ہونے کے امکان سے انکار نہیں کیا اور کہا کہ اس کی تفتیش ہوگی۔ واضح رہے کہ گذشتہ چھ اگست کو احمدآباد کے ایک پرائیویٹ اسپتال کے آئی سی یو میں لگی آگ میں 08 کورونا مریضوں کی موت ہو گئی تھی۔
