عائشہ کا شوہر عارف ولد بابو خان پالی میں اندرا کالونی کے علاقہ میں اپنی بہن کے گھر میں چھپا ہوا تھا۔ اس کی اطلاع گجرات پولیس کو ملی تو انہوں نے ٹراسپورٹ نگر تھانہ پولیس کو اطلاع دی اور پیر دیر رات کو عارف کو ٹرانسپورٹ پولیس نے گرفتار کر لیا۔ گجرات پولیس دیر رات اسے اپنے ساتھ لے گئی۔
ٹرانسپورٹ نگر تھانہ پولیس سے ملی جانکاری کے مطابق بیوی کو پریشان کرنے اور خودکشی کے لیے اکسانے کے معاملہ میں گجرات پولیس عائشہ کے شوہر عارف کو تلاش کرنے کے لیے پالی آئی تھی۔
اس کے ٹرانسپورٹ نگر تھانہ علاقہ کے اندرا کالونی میں ہونے کی اطلاع پر پولیس نے ٹرانسپورٹ نگر تھانہ پولیس سے رابطہ کیا، جس پر ٹرانسپورٹ نگر تھانہ پولیس نے عارف کو اس کے بہن کے یہاں سے گرفتار کیا۔
اس تعلق سے سابرمتی ریور فرنٹ ویسٹ پولس کے انسپکٹر وی ایم دیسائی نے بتایا کہ عارف خان کو پالی سے گرفتار کیا گیا۔ اس سے قبل پولس کی ایک ٹیم بھی جالور میں واقع عارف کے گھر گئی تھی لیکن وہ وہاں نہیں تھا۔
مزید پڑھیں:
عائشہ خودکشی معاملہ: عائشہ کے وکیل ظفر خان پٹھان سے خصوصی گفتگو
گزشتہ چار دن سے عارف فرار تھا، اس لیے ٹیکنالوجی کی مدد سے ملزم کو پیر کی رات پالی سے گرفتار کیا گیا۔ اب اسے ٹرانزٹ ریمانڈ کے ذریعے احمدآباد لایا گیا ہے اور آج دوپہر اسے احمدآباد کی شیشن کورٹ میں پیش کیا جاے گا۔
