زرعی قوانین کے خلاف گذشتہ 20 روز سے کسانوں کا احتجاج جاری ہے جبکہ آج وزیراعظم نریندر مودی نے ایک بار پھر کسانوں کو اس بات کا یقین دلایا کہ ’حکومت ان کے تمام خدشات کو دور کرنے کےلیے تیار ہے‘۔
نریندر مودی نے گجرات کے کچ میں ایک تقریب سے خطاب کرتے ہوئے اپوزیشن پر کسانوں کو بھڑکانے اور گمراہ کرنے کا الزام عائد کیا۔ انہوں نے کہا کہ ’حکومت ہمیشہ کسانوں کی فلاح و بہبود کےلیے پرعزم ہے تاہم ہم کسانوں کے تمام خدشات کو دور کرنے کےلیے تیار ہے‘۔
قبل ازیں من کی بات پروگرام میں بھی وزیراعظم نے زرعی قوانین کی مکمل حمایت کا اظہار کرتے ہوئے حکومت کے موقف کو واضح کیا تھا۔ آج ایک بار پھر مودی نے زرعی قوانین پر مرکزی حکومت کے موقف کا اعادہ کیا۔
کسان تنظیمیں تینوں زرعی قوانین کی منسوخی تک احتجاج کو جاری رکھنے پر بضد ہیں جبکہ حکومت کسی بھی صورت میں قوانین کو منسوخ نہ کرنے کے اپنے فیصلہ پر اٹل ہے۔ گذشتہ ہفتہ بی جے پی نے کانگریس پر کسانوں کو بھڑکانے کا الزام عائد کرتے ہوئے احتجاج کو سیاسی قرار دیا تھا۔ دوسری جانب تمام اپوزیشن جماعتوں نے کسانوں کے موقف کی تائید کی ہے۔
