وارث خان پٹھان نے ای ٹی وی بھارت نمائندہ سے بات چیت کرتے ہوئے کہا کہ آل انڈیا مجلس اتحاد المسلمین گجرات میں بڑی مضبوطی کے ساتھ اسمبلی انتخابات لڑنے والی ہے۔ جس کے پیش نظر میں نے سورت کا دورہ کیا۔ وہاں میم کی سیٹی آفس (سورت) کا افتتاح کیا اور آج احمدآباد کے بہرام پورہ اور جوہاپورہ میں لوکل آفس کا افتتاح کرتے ہوئے پروگرام میں حصہ لوں گا۔ گجرات میں ہم الیکشن کی بڑے ہی مضبوط طریقے سے تیاری کررہے ہیں اور یہاں سے الیکشن بھی لڑیں گے۔
انہوں نے کہا کہ بڑے افسوس کی بات ہے کہ فی الحال سورت میں ایک بھی مسلم کونسلر یا رکن اسمبلی نہیں ہے۔ اب ہم وہاں الیکشن لڑیں گے اور جیت کر دکھائیں گے۔ انہوں نے کہا کہ ہمیں پورا بھروسہ ہے کہ گجرات اسمبلی انتخابات میں گجرات کی عوام ہم کو سپورٹ کرے گی اور مجلس کے نمائندوں کو اسمبلی بھیجے گی۔
یہ بھی پڑھیں: 'اگر شاہ رخ بی جے پی میں شامل ہوجائے تو منشیات چینی کا پاؤڈر بن جائے گا'
احمدآباد میں میم کا کیا فوکس رہے گا، اس تعلق سے وارث خان پٹھان نے کہا کہ گجرات میں مجلس اتحاد المسلمین نے بہت محنت کی ہے اور الیکشن کے لیے ٹیم تیار ہوچکی ہے۔ ہم عوام کے ہر طرح کے مسائل کو حل کرنے کے لیے آئے ہیں۔ ان مدعوں کو ہم اٹھائیں گے اور مضبوطی کے ساتھ سنہ 2022 میں ہونے والے اسمبلی انتخابات لڑیں گے۔
