رکی پڑی تنخواہوں کو واگزار کرنے اور دیگر مطالبات کو پورا کیے جانے کی مانگ کرتے ہوئے محکمہ بجلی میں یومیہ اجرت پر کام کر رہے عارضی ملازمین یکم مارچ سے ضلع گاندربل میں احتجاج کر رہے ہیں۔
گاندربل سب ٹرانسمیشن ڈویژن سے وابستہ عارضی ملازمین مطالبات کو منوانے کے لیے اپنے دفتر کے سامنے خیمہ زن ہو کر شب و روز احتجاج کر رہے ہیں۔
احتجاج کر رہے درجنوں عارضی ملازمین کا کہنا ہے کہ آفات سماوی، خراب موسم اور دیگر ہنگامی صورتحال کے دوران عارضی ملازمین مستعدی سے کام کرتے ہوئے بجلی کی سپلائی کو یقینی بناتے ہیں تاہم اسکے باوجود انہیں اجرتوں سے محروم رکھا جا رہا ہے۔
انہوں نے حیرانگی کا اظہار کرتے ہوئے کہا کہ محکمہ میں کام کر رہے دیگر اضلاع سے وابستہ عارضی ملازمین کی اجرتیں وقت پر بحال کی جاتی ہیں، تاہم ’’ضلع گاندربل میں کام کر رہے عارضی ملازمین کو جان بوجھ کر نظر انداز کیا جا رہا ہے۔‘‘
