گاندربل: آتشزدگی میں رہائشی مکان خاکستر

وسطی کشمیر کے ضلع گاندربل کے کنگن علاقے میں آتشزدگی کے واقعے میں ایک رہائشی مکان اور اس میں موجود لاکھوں روپے کی مالیت کا سامان جل کر راکھ ہو گیا۔

ضلع گاندربل کے بارولہ، کنگن علاقے میں ہفتہ کی دوپہر آتشزدگی کے ایک واقعہ میں رہائشی مکان خاکستر ہو گیا۔

مقامی باشندوں کے مطابق ہفتہ کی دوپہر ہلال احمد نامی ایک مقامی شخص کے مکان سے آگ نمودار ہوئی جس نے آناً فاناً پوری عمارت کو اپنی زد میں لے لیا۔

مقامی باشندوں نے فوری طور فائر اینڈ ایمرجنسی کو اطلاع دی۔ مقامی رضاکاروں اور محکمہ فائر اینڈ ایمرجنسی کے عملہ نے بروقت کارروائی کر کے آگ کو مزید پھیلنے سے روک دیا، تاہم اس دوران مکان میں موجود راکھوں روپے مالیت کا سامان راکھ کے ڈھیر میں تبدیل ہو گیا۔

آتشزدگی کے اس واقعے میں کسی جانی نقصان کی کوئی اطلاع نہیں ہے۔