ضلع گاندربل کے کنگن وسن علاقے میں نالہ سندھ سے غیر قانونی طور پر ریت اور بجری نکالنے میں ریت مافیہ سرگرم ہے۔
اطلاعات کے مطابق وُسن کنگن علاقے میں ریت مافیہ نالہ سندھ سے دن دھاڑے جے سی بی کا استمال کر کے بجری اور ریت نکالتے ہیں۔
اس ضمن میں علاقے کے لوگوں نے کہا کہ غیر قانونی طور پر کچھ لوگ نالہ سندھ کا وجود ختم کرنے پر تلے ہیں۔ اس سے نہ صرف نالہ سندھ کا وجود بلکہ پورے علاقے کو خطرہ لاحق ہے۔
علاقے کے لوگوں نے مزید تفصیلات فراہم کرتے ہوئے کہا کہ چند خود غرض لوگ متعلقہ محکمہ کے ساتھ ساز و باز کر کے غیر قانونی اور ناجائز طریقے سے نالہ سندھ سے ریت اور بجری نکالتے ہیں۔ اس کی وجہ سے مچھلیوں کا وجود بھی ختم ہو رہا ہے جبکہ اس کے ساتھ ساتھ نالہ سندھ کی خوبصورتی پر بھی بہت برا اثر پڑ سکتا ہے۔
انہوں نے کہا کہ نالہ سندھ قدرتی خوبصورتی اور مختلف اقسام کی مچھلیوں کے لیے پوری دنیا میں مشہور ہے۔ تاہم ایسے کارناموں سے اس کی شان ختم ہو سکتی ہے۔
یہ بھی پڑھیے: گاندربل: مانسبل جھیل میں صفائی مہم
علاقے کے لوگوں نے متعلقہ محکمہ پر سخت برہمی کا اظہار کرتے ہوئے کہا کہ متعلقہ محکمہ خاموش تماشائی بن کے بیٹھا ہے۔ ایسا لگتا ہے کہ یہ ان کی ساز باز سے ہو رہا ہے۔ انہوں نے اس ضمن میں گورنر انتظامیہ سے مداخلت کی اپیل کرتے ہوئے کہا کہ وہ نالہ سندھ سے ریت و باجری نکالنے والے ریت مافیاؤں کے خلاف سخت سے سخت کاروائی کریں۔
