کنگن کے لوگ محکمہ پی ڈی ڈی کے خلاف سراپا احتجاج

لوگوں نے کہا کہ بجلی محکمہ نے اس سے قبل بھی کئی بار وعدے کیے کہ 250KV ٹرانسفارمر نصب کیا جائے گا تاہم ابھی تک وہ وعدہ وفا نہیں ہوسکا۔

ضلع گاندربل میں ہاری گانیوان کنگن کے لوگوں نے محکمہ بجلی کے خلاف احتجاج کیا اور زبردست نعرے بازی کی۔ احتجاجیوں نے محکمہ بجلی اور ضلع انتظامیہ پر ان کے علاقے کو جان بوجھ کر نظر انداز کرنے کا الزام عائد کیا ہے۔
احتجاجیوں کا کہنا تھا کہ 'ہمیں سخت سردیوں کے ایام میں بجلی جیسی بنیادی ضرورت سے محروم رکھا گیا ہے اور محکمہ بجلی کے اعلیٰ افسران ٹس سے مس نہیں ہو رہے ہیں۔'

انہوں نے کہا کہ ان کا ٹرانسفارمر تقریبا 20 دن قبل خراب ہوگیا ہے تاہم اسے آج تک ٹھیک نہیں کیا گیا۔احتجاج کر رہے لوگوں نے بتایا کہ وہ اپنی شکایت لیکر ایگزیکٹو انجینئر محکمہ بجلی کے علاوہ کئی افسران سے ملے تاہم ہر جگہ سے انہیں مایوسی کا سامنا کرنا پڑا۔ انہوں نے مزید کہا کہ انکی علاقے میں سو کے وی ٹرانسفارمر نصب کیا گیا ہے جس پر 250 کے آس پاس چولہے مشتمل ہیں۔لوگوں نے کہا کہ بجلی محکمہ نے اس سے قبل بھی کئی بار وعدے کیے کہ 250KV ٹرانسفارمر نصب کیا جائے گا تاہم ابھی تک وہ وعدہ وفا نہیں ہوا۔علاقے کے لوگوں نے کہا کہ بجلی کی ترسیلی لائنیں اور کھمبے بوسیدہ ہوگئے ہیں جو کسی بڑے خطرے کی نشانی پیش کر رہے ہیں۔ لیکن محکمہ کوئی کارروائی نہیں کر رہاہے۔