وسطی کشمیر میں ضلع گاندربل کے کنگن علاقے میں ریچھ نے تین خواتین پر حملہ کرکے لہو لہان کر دیا جس میں سے ایک خاتون کی حالت نازک بتائی جا رہی ہے۔
وانی محلہ، کنگن علاقے میں تین خواتین کھیتوں میں روز کی طرح گھاس کاٹنے کے لیے گئی تھیں جس دوران ایک ریچھ نمودار ہوا اور ایک خاتون پر حملہ کرکے شدید طور پر زخمی کر دیا۔ دیگر خواتیں کے شور شرابے کی وجہ سے ریچھ خاتون کو بری طرح زخمی کرنے کے بعد بھاگ نکلا تاہم اس نے دو اور خواتین کو بھی زخمی کر دیا۔
زخمی خواتین کو فوری طور سب ضلع ہسپتال کنگن پہنچایا گیا جہاں ڈاکٹروں نے ابتدائی علاج و معالجے کے بعد شدید طور پر زخمی ایک خاتون کو صورہ میڈیکل انسٹی ٹیوٹ منتقل کیا۔ دیگر دو خواتین کی حالت مستحکم بتائی جا رہی ہے۔
مقامی لوگوں کا کہنا ہے کہ ریچھ اس علاقے میں گزشتہ کئی روز سے گھوم رہا تھا۔ انہوں نے اس ضمن میں محکمہ وائلڈ لائف کے افسران سے ریچھ کو پکڑنے کی گزارش کی ہے۔
