گھٹلی باغ، گاندربل علاقے کے لوگوں نے بدھ کو ضلع انتظامیہ کے خلاف احتجاجی مظاہرہ کرتے ہوئے محکمہ صحت عامہ، محکمہ صحت اور ضلع انتظامیہ کے خلاف نعرے بازی کی۔
احتجاجی مظاہرین نے الزام عائد کرتے ہوئے کہا کہ ’’علاقے کی اہم سڑکوں کی حالت انتہائی خستہ ہے جیس کی وجہ سے لوگوں کو آمد و رفت میں دقتوں کا سامنا کرنا پڑتا ہے۔‘‘
انہوں نے الزام عائد کرتے ہوئے کہا کہ کئی مرتبہ انہوں نے سڑک کی خستہ حالی کے حوالے سے ضلع ترقیاتی کمشنر حتی کہ بیک ٹو ولیج پروگرام میں بھی شکایات درج کیں تاہم ’’عوام کو بنیادی سہولیات سے محروم رکھا جا رہا ہے۔‘‘
انہوں نے علاقے میں طبی سہولیات کے فقدان کے حوالے سے بھی ضلع انتظامیہ اور محکمہ صحت کو تنقید کا نشانہ بنایا۔
مقامی باشندوں کے مطابق ہیڈر میدان میں موجود ہسپتال میں ڈاکٹروں اور طبی عملہ کی عدم موجودگی کی وجہ سے مریضوں کو علاج و معالجے کے لیے ضلع ہسپتال گاندربل یا سرینگر کے مختلف ہسپتالوں کا رخ کرنا پڑتا ہے۔
احتجاجیوں نے ضلع انتظامیہ سے علاقہ گھٹلی باغ میں تمام بنیادی سہولیات فراہم کرنے اور عوام کی مشکلات کا ازالہ کرنے کی اپیل کی۔
