جموں و کشمیر کے ضلع ڈوڈہ سے تقریبا 35 کلو میٹر دوری پر واقع گُرمل گاؤں میں ایک بے قابو گاڑی گہری کھائی میں جا گری، ذرائع کے مطابق یہ گاڑی ڈوڈہ سے گُرمل کاستی گڑھ کی طرف جا رہی تھی کہ اچانک حادثے کی شکار ہوگئی، جس کی وجہ سے ایک شخص ہلاک جبکہ چار افراد کے زخمی ہوگئے۔
عینی شاہدین کے مطابق علاقہ میں گزشتہ شب سخت برفباری سے درجہ حرات میں زبردست کمی واقع ہوئی ہے اور سڑک پر برف جمی ہوئی تھی، جو حادثہ کی وجہ بنی۔
بتایا جا رہا ہے کہ حادثہ میں سوار لوگ ٹھاٹھری سے گُرمل میں کسی گھریلو پروگرام میں شرکت کرنے جا رہے تھے، لیکن وہ اپنی منزل مقصود سے قریب پہنچ کر حادثے کے شکار ہوگئے، گاڑی سڑک سے چار سو فِٹ گہری کھائی میں جا گری۔
علاقہ میں خون کو منجمد کرنے والی ٹھنڈ، مسلسل بارش اور برفباری کے باوجود مقامی لوگوں نے فوراً جائے حادثہ پر پہنچ کر بچاؤ کا کام شروع کیا اور سخت مشقت کے بعد زخمیوں کو کسی طرح سڑک تک پہنچایا۔
وہیں حادثے کی خبر پھیلتے ہی ڈوڈہ کی معروف سماجی و فلاحی تنظیم ابابیل اپنے رضاکاروں کے ہمراہ جائے حادثہ گُرمل پہنچ کر اپنے ایمبولنس کے ذریعہ شدید زخمی افراد کو علاج کے لیے گورنمنٹ میڈیکل کالج ڈوڈہ میں منتقل کرایا گیا، حادثہ میں ہلاک ہونے والے شخص کی شناخت عبدالواحد مسکن ٹھاٹھری کے طور پر ہوئی ہے۔
