جموں وکشمیر کے پہاڑی ضلع ڈوڈہ میں ضلع انتظامیہ کی طرف سے عوامی مراکز میں یک روزہ روزگار میلے کا انعقاد کیا گیا۔ ضلع ترقیاتی کمشنر ڈوڈہ نے روزگار میلے کا افتتاح کیا۔ اس موقع پر اُن کے ہمراہ نو منتخب ضلع ترقیاتی کونسل چیئرمین دھنہتر سنگھ بھی موجود تھے۔
بے روزگار نوجوانوں کو روزگار فراہم کرنے کے لئے انتظامیہ کی طرف سے سکل ڈیولپمنٹ کے اشتراک سے منعقدہ میلے میں مختلف محکمہ جات نے نوجوانوں کو بیدار کرنے کے لئے اسٹال لگائے تھے۔ جس میں مختلف محکموں کے تحت چلنے والی سرکاری اسکیموں کے حوالے سے اُن کو آگاہ کیا جس سے وہ استفادہ حاصل کر سکتے ہیں۔
ضلع انفارمیشن آفیسر ڈوڈہ اشرف وانی نے بتایا کہ یہاں ایک روزہ میلہ محکمہ ٹیکنیکل ڈیویلپمنٹ کمیٹی ڈوڈہ کی طرف سے سنکلپ اسکیم کے تحت اور ڈسٹرکٹ ایمپلائمنٹ سنٹر ڈوڈہ کے اشتراک سے ضلع ترقیاتی کمشنر کی نگرانی منعقد کیا گیا تھا۔ جس میں متعدد نجی کمپنیوں اور ڈوڈہ کے مقامی اسکول و دیگر اِداروں کو مدعو کیا گیا تھا۔
یہ بھی پڑھیں: ڈوڈہ : عوام کے مسائل کے حل کے لیے ڈی سی کا ٹھاٹھری دورہ
میلے میں تمام تعلیم یافتہ بےروزگار نوجوانوں کا اندراج کیا گیا جن کی تعلیمی قابلیت متعلقہ کمپنیوں کو دی جائے گی اور وہ ہی اُن کو روزگار فراہم کریں گے۔ اُنہوں نے بتایا کہ موجودہ وقت میں ہر کسی کو روزگار فراہم کرنا ممکن نہیں ہے اسی لئے کچھ نوجوان ناراض بھی ہوئے لیکن وہ بھرپور کوشش کر رہے ہیں کہ زیادہ سے زیادہ نوجوانوں کو روزگار فراہم کریں۔
میلے میں بھاری تعداد میں خواتین اور نوجوانوں نے شرکت کی جنہوں نے مختلف شعبوں میں ڈگریاں حاصل کی ہیں۔ ضلع انتظامیہ کی طرف سے دعوت ملنے کے بعد سبھی بےروزگار نوجوانوں نے روزگار حاصل کرنے کے لئے ڈوڈہ کا رُخ کیا جہاں اُن کی سہولیت کے لئے مختلف محکموں نے اسٹال بھی قائم کئے تھے۔
