مرکز کے زیر انتظام جموں و کشمیر کے پہاڑی ضلع ڈوڈہ میں علاقہ گندو کے بھرتی علاقہ سے تعلق رکھنے والے ایک نئے شادی شُدہ جوڑے کو گندو میں قرنطینہ مرکز منتقل کیا گیا۔
نمائندے کے مطابق شادی میں بطور براتی شامل ہونے والے ایک شخص کا کورونا وائرس ٹیسٹ مثبت پائے جانے کے بعد دولہا، دلہن اور اُن کے ساتھ چار براتیوں کو قرنطینہ مرکز میں رکھا گیا ہے۔ دلہن کا تعلق ضلع رام بن کے رامسو علاقے سے بتایا جا رہا ہے جو کہ ریڈ زون کے زمرے میں آتا ہے۔
ضلع ڈوڈہ میں پانچ مختلف مقامات پر کووڈ19 جانچ کے لئے نمونے حاصل کیے جا رہے ہیں، جہاں مذکورہ جوڑے کے علاوہ دیگر براتیوں کے نمونے حاصل کرکے ٹیسٹنگ کے لیے روانہ کیے گئے۔ رپورٹ آنے تک اُن کو انتظامی قرنطینہ میں ہی رکھا جائے گا۔
قابل ذکر ہے کہ مرکز کے زیر انتظام جموں و کشمیر میں کووڈ19 معاملات میں بتدریج اضافہ ہو رہا ہے اور اموات کی تعداد میں بھی متواتر اضافہ ہو رہا ہے۔
