پہاڑی ضلع ڈوڈہ کے چھانگا، بھلیسہ میں جموں سے وابستہ کانگریس کے رکن اور ڈی ڈی سی ممبر شاہنواز چوہدری کے خلاف زبردست احتجاجی مظاہرہ کیا گیا۔
احتجاج کے دوران جموں و کشمیر ریاستی کانگریس صدر جی اے میر اور ڈی ڈی سی ممبر شاہنواز چوہدری کے خلاف نعرہ بازی کرتے ہوئے شاہنواز چودھری کا پتلہ بھی نذر آتش کیا گیا۔
قابل ذکر ہے کہ ڈوڈہ غلام نبی آزاد کا آبائی علاقہ ہے۔
مظاہرین نے شاہنواز چودھری کے غلام نبی آزاد کے متعلق بیان بازی اور ان کے خلاف احتجاج کرنے کی مذمت کرتے ہوئے کانگریس صدر جی اے میر سے معاملہ کی وضاحت طلب کی ہے۔
مظاہرین نے کہا کہ ’’غلام نبی آزاد نے کانگریس کی خدمت میں اپنی پوری زندگی صرف کر دی۔ وہ جموں و کشمیر ہی نہیں بلکہ پورے ہندوستان میں قد آور سیاسی لیڈر کے طور پر تسلیم کیے جاتے ہیں۔‘‘
احتجاجیوں نے شاہنواز چودھری کو تنقید کا نشانہ بناتے ہوئے کہا کہ ’’شاہنواز چودھری کانگریس میں کوئی حیثیت نہیں رکھتے۔ انہوں نے ڈی ڈی سی انتخابات میں آزاد امیدوار کے طور پر شرکت کی ہے۔‘‘
واضح رہے کہ چند روز قبل شاہنواز چودھری نے غلام نبی آزاد کی جانب سے وزیر اعظم نریندر مودی کی تعریف کیے جانے پر برہمی کا اظہار کرتے ہوئے جموں میں آزاد کے خلاف احتجاج کیا تھا۔
