'الفاظ میرے دکھ درد کی وضاحت نہیں کر سکتے'

لداخ کے گلوان وادی میں بھارت چین کے درمیان کشیدگی جاری ہے۔ اس پرتشدد جھڑپ میں بھارتی فوج کے 20 جوان ہلاک ہوگئے ہیں۔

کانگریس کے رہنما راہل گاندھی نے مشرقی لداخ کے گلوان وادی میں چینی افواج کے ساتھ پرتشدد جھڑپ کے بعد ہلاک ہونے والے 20 بھارتی فوجیوں کو خراج تحسین پیش کیا۔

راہل گاندھی نے ٹویٹر پر لکھا کہ ' لداخ میں جن فوجی جوانوں نے ملک کے لیے اپنی جانیں قربان کر لی ان کے لیے جو تکلیف میں محسوس کر رہا ہوں، میں وہ بیان نہیں کرسکتا ہوں۔'

راہل گاندھی نے مزید کہا کہ' ہلاک شدہ فوجی اہلکاروں کے تمام پیاروں سے میری تعزیت۔ ہم اس مشکل وقت میں آپ کے ساتھ کھڑے ہیں۔'

راہل گاندھی نے مرکزی حکومت سے سوال کرتے ہوئے ٹوئٹ کیا ہے کہ' آخر چین ہمارے جوانوں کو کیسے مار سکتا ہے، ان کی ہمت کیسے ہوئی ہماری زمین کو ضبط کرنے کی۔ آخر وزیراعظم خاموش کیوں ہیں۔'

'الفاظ میرے دکھ درد کی وضاحت نہیں کر سکتے'

وہیں کانگریس کی صدر سونیا گاندھی نے بھی لداخ میں ہلاک ہوئے فوجیوں کے اہل خانہ سے تعزیت کی۔

سونیا گاندھی نے ایک بیان میں کہا کہ' فوجی جوانوں کو خراج تحسین پیش کرتی ہوں اور ان کے بہادر اور غمزدہ کنبوں سے تعزیت ہے۔ ہم اپنی سلامتی اور ملکی سالمیت کے دفاع میں ایک ساتھ ہیں ۔'

واضح رہے کہ فوجی ذرائع نے ای ٹی وی بھارت کو بتایا کہ لداخ میں بھارت چین کے درمیان کشیدگی کے مابین بھارتی فوج کے 20 جوان ہلاک ہوئے ہیں، جبکہ ہلاکتوں کی تعداد میں مزید اضافہ ہو سکتا ہے۔