ٹول کِٹ معاملہ میں دہلی پولیس کی سائبر سیل نے نکیتا جیکب اور شانتنو کو پوچھ گچھ کے لئے طلب کیا ہے۔ دونوں کو بامبے ہائی کورٹ سے ضمانت ملی ہوئی ہے لیکن سائبر سیل نے انہیں پوچھ گچھ کے لئے طلب کیا ہے۔ اس سلسلے میں دونوں سائبر سیل کے دفتر پہنچ گئی ہیں۔
واضح رہے کہ بامبے ہائی کورٹ نے گزشتہ بدھ کے روز کسانوں کے احتجاج سے متعلق 'ٹول کِٹ' دستاویز کیس کے سلسلے میں نکیتا جیکب کی عبوری ضمانت کی عرضی منظور کر لی اور نکیتا کو تین ہفتوں کی راحت دی گئی۔
نکیتا جیکب کی وکیل سنجکتا ڈے نے بتایا کہ 'بامبے ہائی کورٹ کے جج نے کہا کہ وہ مسلسل تحقیقات میں تعاون کر رہی ہیں اور اگر دہلی پولیس انہیں سمن بھیجتی ہے تو وہ حاضر ہو جائیں گی۔'
انہوں نے کہا کہ 'اس دوران (تین ہفتے) ہمیں دہلی کی عدالت سے باضابطہ عبوری ضمانت حاصل کرنے کے لیے رجوع کرنا ہے۔'
عدالت نے کہا کہ گرفتاری کی صورت میں انہیں 25 ہزار روپے کے ذاتی مچلکے اور شیوریٹی کے رقم کے عوض رہا کیا جائے گا۔
دہلی پولیس کے ذرائع نے کہا ہے کہ 'ٹول کِٹ' کیس میں جیکب کو اہم ذمہ داری ادا کرنا تھا۔
ذرائع کے مطابق دہلی پولیس نے دعویٰ کیا ہے کہ 'ٹول کِٹ' معاملے میں دِشا روی اور شانتانو ملک بھی شک کے دائرے میں ہیں۔
دِشا روی کو اتوار کے روز گرفتار کیا گیا اور دہلی کی عدالت نے دِشا روی کو پانچ روز کی پولیس حراست میں بھیج دیا ہے۔
