گریٹر نوئیڈا کی بسرکھ پولیس نے 3 شاطر بدمعاشوں کو گرفتارکیا ہے، جنہوں نے 20 ستمبر کو صرف اپنا شوق کو پورا کرنے کےلیے ڈیوٹی پر مامور ایک گارڈ سے رائفل چھین کر فرار ہوگئے تھے۔ پولیس نے ان کے قبضے سے لوٹی ہوئی رائفل، کچھ زندہ کارتوس، ایک غیرقانونی اسلحہ اور 3 موبائل فون برآمد کئے۔
ملزمین کی شناخت وشال، یوگیندر اور وکاس کے طور پر کی گئی جو اب پولیس تحویل میں ہیں۔ ابتدائی تحقیقات سے پتہ چلا ہے کہ یوگیندر کو اپنے دوست کے پاس اسلحہ دیکھ کر اسے بھی اسلحہ رکھنے کا شوق ہوا جس کے بعد تینو ملزمین نے ڈیوٹی پر تعینات گارڈ کے پاس سے لائسنس یافتہ رائفل اور کارتوس لوٹ لئے۔
ڈی سی پی ہریش چندر نے بتایا کہ ڈکیتی کا یہ واقعہ اپنے شوق کو پورا کرنے کےلیے انجام دیا گیا جبکہ ملزمین کا کوئی مجرمانہ ریکارڈ نہیں ہے۔ انہوں نے ملزمین کو گرفتار کرنے والی پولیس ٹیم کو 50 ہزار روپئے دینے کا اعلان کیا۔
