ریاست ہریانہ کے ضلع نوح کے ڈپٹی کمشنر دھیریندر کھڑگٹا نے حکومت کی گائیڈلائن کو سختی سے نافذ کرنے کے احکامات جاری کیے ہیں۔ انہوں نے کہا کہ بھارتی حکومت کی طرف سے ان لاک-4 کا اعلان کر دیا گیا ہے۔ ان لاک 4، 30 ستمبر تک جاری رہے گا۔
انہوں نے کہا کہ اس دوران حکومت کی گائیڈلائن کو سختی سے نافذ کیا جائے گا اور خلاف ورزی کرنے والوں پر سخت کارروائی کی جائے گی۔
ضلع کے سبھی اسکول، تعلیمی ادارے، کوچنگ سینٹرز 30 ستمبر تک بند رہیں گے۔ آن لائن اور ڈسٹینس کلاسیز جاری رہیں گی۔ 21 ستمبر کے بعد سماجی، تعلیمی، کھیل، صحت اور انٹرٹینمنٹ جیسے پروگراموں میں 100 لوگوں کو شامل ہونے کی اجازت رہے گی جس میں ماسک، سماجی دوری، سینیٹائزر وغیرہ کے انتظامات کرنے ہوں گے۔
انہوں نے مزید بتایا کہ 20 ستمبر تک شادی سے متعلق تقاریب میں پچاس اور میت کی آخری رسومات میں بیس سے زیادہ لوگ شامل نہیں ہو سکتے۔ بعد میں سو لوگوں کی اجازت ہوگی۔
انہوں نے بتایا کہ کورونا وائرس کے پیش نظر سبھی ملازمین کو آروگیہ سیتو ایپ ڈاؤن لوڈ کرنا ہوگا۔
