دور قدیم میں دہلی کو مختلف دفعہ اجاڑا اور بسایا گیا اسی لیے دہلی میں مختلف دور حکومت کے نقوش اب بھی باقی ہیں۔ چاہے وہ قطب الدین ایبک کی دہلی ہو یا شاہ جہاں کی، ہر دور کے منفرد فن تعمیر کے نمونے آج بھی نمایاں ہیں۔
ایسی ہی ایک مسجد ہے جسے فیروز شاہ تغلق کے دور حکومت میں تعمیر کرایا گیا تھا وہ آج بھی اپنے فن تعمیر کی زندہ مثال ہے۔ دارالحکومت دہلی کے ترکمان گیٹ پر واقع کلاں مسجد کو فیروز شاہ تغلق کے وزیر خان جہاں شاہ اور ان کے بیٹے نے سنہ 1387 میں تعمیر کرایا تھا۔
اس مسجد کی خاصیت 30 چھوٹے بڑے گنبد ہیں جن میں اسپین کی تعمیراتی عمارتوں کی جھلک بھی نظر آتی ہے حالانکہ اس طرح کی 7 مساجد دہلی کے مختلف حصوں میں تعمیر کرائی گئی تھی تاہم اب ایک یہی مسجد بہتر حالت میں دیکھی جا سکتی ہے۔
مزید پڑھیے: سجادہ نشینوں کی اجیت ڈوبھال سے ملاقات
زمین سے تقریبا 25 فٹ اونچی اس مسجد میں خستہ حالت کے سبب ضرورت کے حساب سے کچھ تبدیلیاں کی گئی ہیں اب ممبر اور اندر کا فرش تبدیل ہو چکا ہے۔ یہ مسجد دہلی وقف بورڈ کے زیر انتظام ہے۔ تاہم اس کے رکھ رکھاؤ کا سارا خرچ مقامی کمیٹی کے ذمہ دار نمازیوں سے چندہ کرکے اٹھاتے ہیں۔
