عام آدمی پارٹی سے رکن پارلیمان سنجے سنگھ نے کہا کہ جب پارلیمنٹ میں ملک کے وزیر داخلہ اپنی تقریر کر رہے تھے تو ایسا معلوم ہو رہا تھا کہ وہ بھارت میں نہیں خلا میں رہتے ہیں۔
انہوں نے مزید کہا کہ تین دن تک دہلی میں فسادات ہوتے رہے لیکن وزیر داخلہ نے اس پر کچھ بھی نہیں کہا. انہوں نے مزید کہا کہ کپل مشرا کی دہلی پولیس کو دی گئی دھمکی پر بھی کسی طرح کی کاروائی نہیں کی گئی۔ انہوں نے پرویش ورما کے ملک کے غداروں کو گولی مارو... والے بیان پر بھی کچھ نہیں کہا۔
آج دہلی کے فسادات میں 53 سے زائد افراد ہلاک ہو گئے، سینکڑوں دکانوں کو نذر آتش کر دیا گیا اور سینکڑوں گھروں کو آگ کے حوالے کر دیا گیا اور آپ کہہ رہے ہیں دہلی پولیس نے بہت اچھی طرح سے حالات کو سنبھالا ہے۔
سنجے سنگھ نے دہلی پولیس کی کارکردگی پر سوالیہ نشان لگاتے ہوئے کہا کہ دہلی میں نہ صرف طلبہ پر پولیس نے ظلم و ستم کے پہاڑ ڈھائے ہیں بلکہ وکلاء پر بھی گولیاں چلائی ہیں۔ اساتذہ کے سروں کو پھوڑا گیا ہے جو کچھ امت شاہ کے وزیر داخلہ رہتے ہوا ہے وہ کسی کے بھی دور میں دیکھنے کو نہیں ملا ہے۔
