دہلی وقف بورڈ کے ذریعہ ائمہ کی تنخواہوں کی تاخیر پر چیف امام آل انڈیا آرگنائزیشن کے ڈاکٹر امام عمیر احمد الیاسی نے All India Imam Organisation کہا کہ امام کا مرتبہ بہت بلند ہوتا ہے۔ وہ دکھ، درد میں کام آتا ہے، شادی بیاہ، موت اور ہر مصیبت کی گھڑی میں پیش پیش رہتا ہے۔ لیکن جب وہ پریشانی میں مبتلا ہوتا ہے تو کوئی پرسان حال نہیں ہوتا وہ اپنی پریشانیوں پر اف تک نہیں کرتا اس وقت دہلی کے امام تنخواہ کے لیے کافی پریشان ہیں۔ ان کی تنخواہ روکنے کا کوئی جواز نہیں ہے ، اس مہنگائی کے دور میں ائمہ کی تنخواہ انتہائی قلیل ہے۔ اس پر بھی دس ماہ تک روک لینا انتہائی مایوس کن ہے ۔ا ن کی تنخواہ 80 ہزار روپے ہونی چاہیے۔
ساڑھے پانچ لاکھ اماموں کی نمائندگی کرنے والے ڈاکٹر امام عمیر احمد الیاسی نے ای ٹی وی بھارت سے خصوصی بات چیت کے دوران کہا کہ ائمہ کی تنخواہ کے معاملے پر ایک میٹنگ ہوئی ہے۔ جس میں ہر پہلو پر بات چیت کی گئی ہے۔ امید ہے کہ دہلی وقف بورڈ کے ائمہ کی بقایہ تنخواہ ایک دو دن میں ریلیز ہوسکتی ہے۔ انہوں نے کہا کہ ائمہ کی پریشانی کو دیکھتے ہوئے پورے بقایہ تنخواہ کو جاری کرنے کا مطالبہ کیا گیا ہے۔
انہوں نے کہا کہ سپریم کورٹ نے 1993 میں اماموں کے تعلق سے ایک تاریخی فیصلہ میں کہا کہ امام 24 گھنٹے اپنی خدمات کو انجام دیتا ہے اس کے پاس دیگر کوئی کام نہیں ہوتا ہے۔ اس لیے اس کو فرسٹ کلاس افسر کے مطابق تنخواہ ملنی چاہیے۔
انہوں نے کہا کہ 1993 میں سپریم کورٹ کے فیصلے کے مطابق ائمہ کی تنخواہ 80 ہزار ہونی چاہیے لیکن دکھ کی بات ہے کہ جگہ جگہ اماموں کی تنخواہ کہیں 6 ہزار، 10 ہزار، 12 ہزار، 15 ہزار ہی دی جارہی ہیں۔
ڈاکٹر الیاسی نے کہا کہ دہلی کے وزیر اعلیٰ اروند کیجریوال نے وعدہ کیا تھا کہ وقفہ وقفہ پر اماموں کی تنخواہ میں اضافہ کیا جائے گا۔ تو اب وقت آگیا ہے کہ ان کی تنخواہ میں اضافہ کیا جائے۔ Arvind Kejriwal Announcds Salary Hike for Imams of all Mosques in Delhi
ڈاکٹر امام عمیر احمد الیاسی نے مرکزی اور دہلی حکومت سے مطالبہ کیا کہ ائمہ کی پریشانی کو دھیان میں رکھتے ہوئے ان کی تنخواہ 80 ہزار روپے کی جائے۔ فی الفور کم سے کم امام کی تنخواہ 25 ہزار اور موذنین کی تنخواہ 15 ہزار اور گارڈ کی تنخواہ 10 ہزار روپے ادا کی جائے۔
واضح رہے کہ وقف بورڈ کے امام کی تنخواہ فی الحال 18 ہزار، موذن کی 14 اور گارڈ کی 7 ہزار روپے ہے جو تقریباً دس ماہ سے باقی ہے۔ اس کو لے کر کئی سیاسی ،سماجی اور ملی شخصیات آواز اٹھا چکے ہیں۔
ڈاکٹر امام عمیر احمد الیاسی نے ائمہ سے صبر رکھنے کی تلقین کی اور کہا کہ ایک دو دن کے اندر تنخواہ ریلیز ہوسکتی ہے۔ اس بارے میں ڈاکٹر امام عمیر احمد الیاسی نے مزید بتانے سے انکار کردیا اور کہا کہ کچھ دن اور صبر رکھیں امید ہے کہ جلد ہی تنخواہ ریلیز ہوجائے گی۔
