تبدیلی مذہب معاملہ میں پولیس سے خاتون پریشان: وکیل سرفراز حسین

جبراً تبدیلی مذہب معاملہ میں محمد عمر گوتم اور مفتی جہانگیر قاسمی کی گرفتاری کے بعد اب یو پی اے ٹی ایس ان لوگوں کو بھی پریشان کر رہی ہے جنہوں نے اپنی مرضی سے مذہب تبدیل کیا ہے ایسی ہی ایک خاتون نے پولیس کے خلاف کارروائی کرنے کا فیصلہ کیا ہے۔

دراصل براہمن خاندان کی ایک خاتون نے سنہ 2017 میں اپنی مرضی سے مذہب بدل کر اسلام قبول کیا تھا، جس کے بعد عمر گوتم کے ذریعے اپنے کاغذات بنوانے میں مدد لی تھی جب سے عمر گوتم اور مفتی جہانگیر کو گرفتار کیا گیا ہے تب سے یہ خاتون بھی پولیس کے ذریعے ہراسانی کا شکار ہے۔

ای ٹی وی بھارت کے نمائندے سے بات کرتے ہوئے اس خاتون کے وکیل نے بتایا کہ ان کی موکل پولیس سے تحفظ فراہم کرنے کے لیے عدالت میں اپیل دائر کرنا چاہتی ہیں تاکہ انہیں پولیس ہراساں نہ کرے۔

انہوں نے مزید کہا کہ نہ صرف میرے موکل کو پریشان کیا جا رہا ہے بلکہ ان کے گھر والوں پر بھی پریشر بنانے کی کوشش کی جا رہی ہے تاکہ ان کے اس بیان کو وہ عمر گوتم اور مفتی جہانگیر کے خلاف استعمال کر سکیں۔

وکیل کا کہنا ہے کہ میری موکل تعلیم یافتہ ہیں۔ انہوں نے پی ایچ ڈی کی ہے اور اسلام کے بارے میں ریسرچ کرنے کے بعد ہی انہوں نے اسلام قبول کیا لیکن اب پولیس کے ذریعے انہیں ہراساں کرنا ہمارے آئین کے خلاف ہے۔