وزیراعظم نے کہا کہ مولانا ابوالکلام آزاد، شعبہ تعلیم سے متعلق پرجوش تھے اور انہوں نے سماج میں بھائی چارے کو مزید بڑھاوا دینے کےلیے جدوجہد کی تھی۔ مودی نے ٹوئٹ کیا کہ ’مولانا ابوالکلام آزاد کو ان کے یوم پیدائش پر خراج عقیدت۔ ایک مفکر، دانشور اور جنگ آزادی میں متاثرکن جدوجہد کے حامل تھے۔ وہ تعلیم کے شعبہ میں کام کرنے کےلیے پرجوش تھے اور انہوں نے معاشرہ میں بھائی چارے کو مزید فروغ دینے کےلیے کام کیا‘۔
نریندر مودی نے آج اپنے پیغام میں مولانا ابوالکلام آزاد کے یوم پیدائش پر ان کی جد وجہد آزادی اور ملک کی تعمیر میں ان کے کردار کو یاد کیا۔
مرکزی وزیر نتن گڈکری نے بھی مولانا ابوالکلام آزاد کو ان کے یوم پیدائش کے موقع پر خراج عقیدت پیش کیا۔ انہوں نے ٹوئٹ کیا کہ ’آزاد بھارت کے پہلے وزیر تعلیم اور بھارت رتن ایوارڈ یافتہ مولانا ابوالکلام آزاد جی کو ان کے یوم پیدائش پر خراج عقیدت۔ قومی یوم تعلیم مبارک‘۔ گڈکری نے ’نیشنل ایجوکیشن ڈے‘ ہیش ٹیگ ٹوئٹ کیا۔
یہ بھی پڑھیں: مجاہد آزادی مولانا ابوالکلام آزاد کی برسی
بھارت رتن یافتہ مولانا ابو الکلام آزاد نے بھارت کی تحریک آزادی میں کافی اہم کردار ادا کیا تھا، وہ انڈین نیشنل کانگریس کے صدر تھے اور آزادی کے بعد ملک کے اولین وزيرتعلیم رہے۔ ابوالکلام آزاد کی پیدائش 1888 میں سعودی عرب کے مکہ میں ہوئی تھی اور 22 فروری 1958 کو دہلی میں ان کا انتقال ہوا۔
