نئی دہلی: کانگریس لیڈر راہل گاندھی نے پارلیمنٹ کی سیکورٹی میں کوتاہی کو ایک سنگین مسئلہ قرار دیتے ہوئے کہا کہ اس واقعہ کا تعلق نوجوانوں میں بے روزگاری اور مہنگائی سے ہے۔
گاندھی نے کہا ’’پارلیمنٹ کی سیکورٹی میں کوتاہی کی وجہ بے روزگاری اور مہنگائی ہے۔ نوکریاں کہاں ہیں؟ نوجوان مایوس ہیں۔ ہمیں اس مسئلے پر توجہ مرکوز کرنی ہے اور نوجوانوں کو نوکریاں دینا ہوں گی۔ یقینی طور پر سیکورٹی میں کوتاہی ہوئی ہے، لیکن اس کے پیچھے وجہ ملک کا سب سے بڑا اور اہم مسئلہ بے روزگاری ہے۔
انہوں نے کہا ’’پارلیمنٹ کی سیکورٹی میں پیش آنے والے واقعے کے پیچھے سب سے بڑی وجہ بے روزگاری اور مہنگائی ہے۔ وزیر اعظم نریندر مودی کی پالیسیوں کی وجہ سے نوجوانوں کو روزگار نہیں مل رہا ہے۔‘‘
پارلیمنٹ کی سیکورٹی میں کوتاہی ایک سنگین معاملہ ہے، حکومت کو اس پر توجہ دینی چاہیے۔ پارلیمنٹ میں بار بار مطالبہ کیا جا رہا ہے کہ وزیر داخلہ یہاں آئیں اور بتائیں کہ یہ کیوں اور کیسے ہوا۔ لیکن وزیر داخلہ پارلیمنٹ میں آنا ہی نہیں چاہتے، وزیر داخلہ کے پاس ٹی وی شوز میں گھنٹوں بیٹھنے کا وقت ہے لیکن ان کے پاس پارلیمنٹ میں آنے کے لیے پانچ منٹ نہیں ہیں۔
گزشتہ بدھ کو، پارلیمنٹ پر 2001 کے دہشت گردانہ حملے کی برسی کے موقع پر، سیکورٹی کی ایک بڑی خلاف ورزی اس وقت سامنے آئی جب لوک سبھا کی کارروائی کے دوران دو افراد سامعین کی گیلری سے ایوان میں داخل ہوئے اور ایک کین کے ذریعے پیلا دھواں چھوڑ دیا۔ واقعے کے فوراً بعد دونوں کو پکڑ لیا گیا۔ اس واقعے کے فوراً بعد پارلیمنٹ ہاؤس کے باہر پیلے اور سرخ دھوئیں سے نکلنے والی چھڑیوں کے ساتھ احتجاج کرنے پر ایک مرد اور ایک خاتون کو گرفتار کر لیا گیا۔ اندر چھلانگ لگانے والے دو افراد کی شناخت ساگر شرما اور منورنجن ڈی کے طور پر کی گئی ہے۔ پارلیمنٹ ہاؤس کے باہر سے گرفتار کیے گئے دو لوگوں کی شناخت ہریانہ کے جیند ضلع کے گاؤں گھاسو خورد کی رہنے والی نیلم (42) اور لاتور (مہاراشٹر) کے رہنے والے امول شندے (25) کے طور پر کی گئی ہے۔
یو این آئی مشمولات کے ساتھ
