دہلی پولس کی سائبر سیل کے جوائنٹ کمشنر پریم ناتھ نے پیر کے روز ایک پریس کانفرنس میں دعوی کیا ہے کہ اس میٹنگ میں ٹویٹر اسٹارم کے لیے ہیش ٹیگ طے کیا گیا تھا اور مکمل منصوبہ بنایا گیا تھا۔
پولس کا کہنا ہے کہ یہ لوگ ملک کو بدنام کرنا چاہتے تھے۔ ان کا کہنا تھا کہ ٹول کٹ کی سازش میں خالصتانی حمایت یافتہ پوئیٹک جسٹس فاؤنڈیشن ملوث تھا۔ اس ٹول کٹ کو جنوری میں تیار کیا گیا تاکہ کسان تحریک کی تشہیر کی جاسکے۔ اس کے ذریعہ بیرون ملک ہندوستانی سفارت خانے کو نشانہ بنانے کا منصوبہ تھا۔
انہوں نے بتایا کہ دیشا روی کو اس معاملے میں گرفتار کیا گیا ہے اور باقی تین ملزمان کی تلاش جاری ہے۔ اس معاملے میں پولیس نے نکیتا جیکب اور شانتون کے خلاف غیرضمانت وارنٹ جاری کیا ہے۔
دہلی پولیس نے بتایا کہ 11 جنوری کو نکیتا جیکب، دیشا روی اور دیگر ایک زوم میٹنگ میں شریک ہوئے۔ میٹنگ کا انعقاد پوئیٹک جسٹس فاؤنڈیشن نے کیا۔ اس زوم میٹنگ کے بعد ٹول کٹ دستاویز تیار کیا گیا تھا۔
انہوں نے انکشاف کیا کہ دشا روی نے ٹول کٹ دستاویز ماحولیاتی کارکن گریٹا تھنبرگ کو ٹیلیگرام ایپ کے ذریعے پہنچا یا ہے۔ اس کے علاوہ، اس ٹول کٹ کو دوسروں تک پھیلانے کے لئے انہوں نے واٹس ایپ گروپ بھی بنایا تھا۔ اس گروپ کو بعد میں ختم کردیا گیا۔
واضح رہے کہ 4 فروری کو دہلی پولس کی سائبر سیل نے ٹول کٹ دستاویز تیار کرنے والے نامعلوم افراد کے خلاف مختلف دفعات کے تحت ایف آئی آر درج کی تھی۔
یو این آئی
