'کورونا کے بڑھتے معاملوں کی وجہ سے لوگ نہ گھبرائیں'

دہلی میں کورونا وائرس کے معاملے ایک لاکھ تک پہنچ گئے ، اور اس انفیکشن سے تین ہزار سے زائد افراد ہلاک ہوئے ہیں۔اس کے باوجود وزیراعلی اروند کیجریوال نے پیر کو پھر اس بات اعادہ کیا کہ اس سے گھبرانے کی ضرورت نہیں ہے۔

کیجریوال نے کہا ہے کہ انفیکشن کے معاملے ایک طرف بڑھ رہے ہیں تو دوسری طرف ٹھیک ہونے والوں کی تعداد میں بھی تیزی سے اضافہ ہورہا ہے۔ مجموعی طور سے 99 ہزار 444 مریضوں میں 71339 کورونا مریض صحتیاب ہوچکے ہیں۔

انہوں نے ویڈیو کانفرنسنگ کے ذریعہ میڈیا کوبتایا کہ گزشتہ ہفتہ کے مقابلے میں دارالحکومت میں کورونا کی صورت حال اور زیادہ بہتر ہوئی ہے۔ پلازما بینک شروع ہوگیا ہے۔ انہوں نے لوگوں سے زیادہ سے زیادہ تعداد میں آکر پلازمہ عطیہ کرنے کی بھی دوبارہ اپیل کی۔

کیجریوال نے کہا کہ 25,000 سرگرم کورونا کے مریضوں میں سے 15,000 کا علاج گھر پر کیا جارہاہے۔ اموات کی شرح میں کمی آئی ہے۔

دہلی میں ملک کا پہلا کورونا پلازمہ بینک کھولا گیاہے۔ جانچ سے پتہ چلا ہے کہ پلازما تھیراپی کئی مریضوں کو ٹھیک کرنے میں مدد کرسکتی ہے۔

کیجریوال نے بتایا کہ دہلی میں اب روزانہ 20,000 سے 24,000 کورونا جانچ کی جارہی ہے۔ جون مہینے کا ذکر کرتے ہوئے کیجریوال نے کہا ہے کہ کم جانچ ہونے پر بھی ہر 100 میں سے 35 کورونا پازیٹیو آتی تھی لیکن اب اس کی تعداد 100 میں سے 11 ہی ہے۔

اسپتالوں میں تقریبا 5100 مریض بھرتی ہیں اور تقریبا 10000 بیڈ خالی ہیں۔ اس وقت دہلی میں جانچ اور بیڈ کی کوئی پریشانی نہیں ہے اور ایپ کے ذریعہ پتہ لگایا جاسکتا ہے کہ کہاں کتنے بیڈ خالی ہیں۔

پلازمہ عطیہ کرنے والوں کی تعداد کم دیکھتے ہوئے وزیراعلی نے کہا ہے کہ اگر پلازما عطیہ کرنے والوں کی تعداد نہیں بڑھی تو اسٹاک میں جو پلازما رکھا ہے وہ سب ختم ہوجائے گا۔ انہوں نے کہا کہ میری ہاتھ جوڑ کر درخواست ہے کہ زیادہ سے زیادہ لوگ آگے آکر پلازما عطیہ کرنے کے لئے آگے آئیں۔

پلازمہ عطیہ کرنے کے وقت کی تکلیفوں کی افواہوں پر وزیراعلی نے کہا کہ گھبرانے کی کوئی ضرورت نہیں ہے، نہ ہی عطیہ دینے والے کو کمزوری آئے گی اور نہ ہی کوئی درد ہوگا۔ کچھ لوگوں کا کہنا ہے کہ اپنے ساتھ کسی کو لے کر جائیں گے تو انفیکشن ہوجائےگا، اس معاملے میں واضح کردوں کہ آئی ایل بی ایس ایک غیر کورونا اسپتال ہے۔