دہلی کانگریس کی صدر اور سابق وزیراعلیٰ شیلا دکشت نے کہا کہ پارٹی کے رہنماوں کی متفقہ رائے ہے کہ پارٹی کو اکیلے ہی الیکشن لڑنا چاہیے اور عام آدمی پارٹی کے ساتھ کوئی اتحاد نہیں کیا جائے۔
کانگریس پارٹی کے صدر راہل گاندھی کے دہلی میں پارٹی کے رہنماوں کے ساتھ تقریباً دو گھنٹے تک چلنے والی میٹنگ کے بعد شیلا دکشت نے یہ اعلان کیا۔
اروند کیجریوال کی قیادت والی عام آدمی پارٹی دہلی کی سات لوک سبھا سیٹوں میں سے چھ پر ہفتہ کے روز اپنے امیدواروں کے ناموں کا اعلان کر چکی ہے۔ اس کے باوجود پارٹی نے کہا تھا کہ کانگریس کی طرف سے کوئی تجویز آنے پر غور کیا جائے گا۔
سنہ 2014 کے عام انتخابات میں دہلی کی تمام سیٹوں پر بی جے پی کامیاب ہوئی تھی جب کہ اس سے پہلے سنہ 2009 میں تمام سیٹوں پر کانگریس نے جیت درج کی تھی۔
سنہ 2015 میں دہلی کے اسمبلی انتخابات میں کانگریس کا صفایا ہوگیا تھا اور بی جے پی صرف تین سیٹ جیت سکی تھی جب کہ عام آدمی پارٹی نے 70 میں سے 67 سیٹو ں پر کامیابی حاصل کی تھی۔
