نئی دہلی: قومی تحقیقاتی ایجنسی (این آئی اے) نے پاپولر فرنٹ آف انڈیا (پی ایف آئی) کی طرف سے رچی گئی مبینہ سازش کو ناکام بنانے کے لیے اتوار کو پانچ ریاستوں میں چھاپوں اور تلاشیوں کا سلسلہ جاری رکھا۔ این آئی اے کے ایک اہلکار نے بتایا کہ کیرالہ، کرناٹک، مہاراشٹر، مغربی بنگال اور بہار میں کنور، ملاپورم، جنوبی کنڑ، ناسک، کولہاپور، مرشد آباد اور کٹیہار اضلاع میں کل 14 مقامات پر چھاپے مارے گئے۔ اہلکار نے دعویٰ کیا کہ چھاپے ماری کے دوران کئی مجرمانہ ڈیجیٹل آلات کے ساتھ ساتھ دستاویزات بھی ضبط کیے گئے ہیں۔ چھاپے کا مقصد ممنوعہ تنظیم کی مبینہ سازش کو بے نقاب کرنا تھا۔
این آئی اے کا دعویٰ ہے کہ "تحقیقاتی ایجنسی، دہشت، تشدد اور توڑ پھوڑ کے ذریعہ 2047 تک بھارت میں اسلامی حکومت قائم کرنے کے لیے مسلح کیڈر بنانے اور پی ایف آئی کی فوج بنانے کی مبینہ کوششوں کو بے نقاب اور ناکام بنانے کی کوشش کر رہی ہے۔" NIA نے کہا کہ ''پی ایف آئی بھولے بھالے نوجوانوں کو بنیاد پرست بنانے اور انہیں ہتھیاروں کی تربیت فراہم کرنے کی سازش کر رہی ہے تاکہ سماج کے بعض طبقات کے خلاف لڑ کر بھارت مخالف ایجنڈے کو آگے بڑھا سکے۔''
این آئی اے نے شبہ ظاہر کیا کہ کئی درمیانی درجے کے پی ایف آئی ایجنٹس ماسٹر ٹرینر کے طور پر کام کر رہے ہیں، جو ملک کی مختلف ریاستوں میں اپنے کیڈروں کو ہتھیاروں، لوہے کی چھڑوں، تلواروں اور چاقو کے استعمال کی تربیت دینے کے لیے تربیتی کیمپوں کا انعقاد کرتے ہیں۔ مبینہ انٹیلی جنس اور تفتیشی رپورٹس اور اپنی سمجھ کی بنیاد پر یہ پچھلے کئی مہینوں سے مختلف ریاستوں میں متعدد مقامات پر چھاپے مار رہی ہے تاکہ ان کیڈروں اور کارکنان کی شناخت اور گرفتاری کی جا سکے۔
پی ایف آئی کے خلاف مقدمہ این آئی اے، دہلی نے اپریل 2022 میں درج کیا تھا۔ ایجنسی کی طرف سے ستمبر 2022 کے دوران ملک گیر کارروائیوں کے بعد مجرمانہ شواہد اکٹھے کیے گئے، جس کی وجہ سے ایک درجن سے زیادہ این ای سی اراکین سمیت پی ایف آئی کے کئی سرکردہ رہنماؤں کو گرفتار کیا گیا۔ این آئی اے نے ملزمان کے خلاف جانچ کی اور مارچ 2023 میں ان میں سے 19 کے خلاف چارج شیٹ داخل کی۔
چارج شیٹ میں پی ایف آئی کو بھی ایک تنظیم کے طور پر نامزد کیا گیا تھا۔ اس کے بعد اپریل 2023 میں پی ایف آئی کے ہتھیار ٹریننگ کے مبینہ نیشنل کوآرڈینیٹر کے خلاف ایک ضمنی چارج شیٹ دائر کی گئی۔ این آئی اے نے اپنی چارج شیٹ میں ایک مبینہ سازش کا دعویٰ کیا جس کے مطابق بھارت کو ایک صدی مکمل ہونے تک ایک اسلامی ریاست بنانا ہے۔
