قومی دارالحکومت دہلی سے متصل ریاست اترپردیش کے سرحدی اور صنعتی شہر نوئیڈا کے رہنے والے اور دہلی کے جی ٹی بی ہسپتال کے کورونا وارڈ میں گارڈ کی حیثیت سے کام کرنے والے وجے کے ساتھ پڑوسیوں نے زیادتی کی اور مارا پیٹا۔
متاثرہ شخص نے الزام لگایا کہ اسے صرف اس لیے مارا پیٹا گیا ہے کہ وہ کورونا مریضوں کے وارڈ میں کام کرتا ہے اور اس کے پڑوس میں رہتا ہے۔
واضح رہے کہ متاثرہ وجے ہرشا وہار کے علاقے میں اپنے کنبہ کے ساتھ رہتا ہے اور جی ٹی بی ہسپتال میں گارڈ کی حیثیت سے کام کرتا ہے، متاثرہ شخص نے بتایا کہ اس کی ڈیوٹی کورونا وارڈ میں ہے، جہاں کورونا مریض ہیں، اور ان کا علاج کیا جاتا ہے۔
انہوں نے بتایا کہ صبح جب وہ اپنے گھر کی چھت پر ورزش کررہے تھے اس وقت محلے میں رہنے والے ایک شخص نے ملازمت کے بارے میں پوچھا، جب وجے نے اس شخص کو اپنی ملازمت کے بارے میں بتایا، تو یہ سن کر وہ شخص مشتعل ہوگیا اور وجے کو گالی دینے لگا۔
اس دوران اس نے وجے سے کہا کہ آپ کورونا مریضوں کے وارڈ میں ملازمت کرتے ہیں، اور آپ یہاں رہتے ہیں کیا آپ یہاں بھی کورونا پھیلائیں گے۔
صرف اتنا ہی نہیں اس شخص نے اپنے کنبہ کے ساتھ مل کر وجے کے گھر میں گھس کر اسے پیٹا اس دوران وجے شدید زخمی ہوگئے، تاہم وجے کے سر میں آٹھ ٹانکے لگے ہیں۔
