کاظم احمد کو ایک خاص طبقہ سے تعلق رکھنے پر نوئیڈا سیکٹر 37 میں کچھ شر پسند عناصر کے ذریعے زبردستی گاڑی میں بٹھا کر زدوکوب کرنا اور اس کے بعد پولیس کی جانب سے کارروائی نہیں کرنے کا معاملہ اب تول پکڑ رہا ہے۔
اس معاملے میں اب قومی اقلیتی کمیشن کے نائب چیئرمین عاطف رشید نے گوتم بدھ نگر پولیس کمشنر کو نوٹس جاری کیا ہے۔ یہ نوٹس قومی اقلیتی کمیشن نے از خود نوٹس لیتے ہوئے جاری کیا ہے۔
اس نوٹس کے ذریعے قومی اقلیتی کمیشن نے گوتم بدھ نگر کے پولیس کمشنر سے 7 دن کے اندر جواب دینے کا مطالبہ کیا ہے۔
نوٹس میں کمیشن نے جواب طلب کرتے ہوئے کہا ہے کہ اب تک ملزمان کے خلاف کیا کارروائی کی گئی ہے؟۔ اس کا جواب دیں، اب تک کتنے لوگوں کو اس معاملہ میں گرفتار کیا گیا ہے جواب دیں، اور جن ملزمان کو گرفتار کیا گیا ہے ان پر کن دفعات کی بنیاد پر کیس درج کیا گیا ہے۔
قابل ذکر ہے کہ گذشتہ اتوار کی صبح کاظم احمد نوئیڈا سیکٹر 37 کے بس اسٹینڈ پر سواری کا انتظار کر رہے تھے، تبھی کچھ شرپسندوں نے انہیں ایک گاڑی میں گھسیٹ لیا اور مارنا پیٹنا شروع کردیا، اس کے بعد نیم مردہ حالت میں کاظم کو سڑک پر ہی چھوڑ کر بھاگ گئے۔
مزید پڑھیں: اے ایم یو، جامعہ، دارالعلوم دیوبند پر بم گرانا چاہیے، نرسنگھانند سرسوتی کا متنازع بیان
جیسے تیسے انہوں نے پولیس میں شکایت درج کرانی چاہی تو پولیس نے ایف آئی آر کرنے سے ہی انکار کردیا تھا، بعد میں معاملہ خبروں میں آیا تو پولیس تھوڑی مستعدی دکھاتے ہوئے اس پورے معاملے کو ہی عام واردات کہہ کر معاملہ رفع دفع کرنے کی کوشش کی۔
