اس دوران وزیر داخلہ امت شاہ نے دہلی کے حالات کو دیکھتے ہوئے مختلف سیاسی جماعتوں کے ساتھ میٹنگ بھی کی ہے اور امن قائم رکھنے میں تعاون کرنےکی اپیل کی ہے۔
قومی سلامتی کے مشیر اجیت ڈوبھال نے دوپہر بعد شمال مشرقی دہلی کے پولیس ڈپٹی کمشنر کے دفتر پہنچ کر صورتحال کا جائزہ لیا اور موج پور سمیت کچھ دیگر تشدد سے متاثرہ علاقوں کا دورہ کیا۔
انہوں نے مقامی افراد سے بات چیت کی اور ان سے خیریت معلوم کی۔ ان کے ساتھ پولیس کے اعلیٰ افسران بھی موجود تھے۔ اس دوران سڑکیں سونی تھیں اور دکانیں بند پڑی تھیں۔ اس سے پہلے انہوں نے گذشتہ دیر رات بھی ضلع کا دورہ کیا تھا۔
وزیر اعظم نریندر مودی نے پرتشدد واقعات پر تشویش کا اظہار کرتے ہوئے دہلی کے عوام سے امن برقرار رکھنے کی اپیل کی ہے۔ حالات پر قابو پانے کے لیے پورے شمال مشرقی ضلع میں اضافی سیکورٹی فورسز کو تعینات کیا گیا ہے اور فسادیوں پر نظر رکھنے کے لیے ڈرون سے بھی نگرانی کی جا رہی ہے۔ تشدد سے سب سے زیادہ متاثر جعفرآباد کی کچھ گلیوں میں پولیس کی جانب سے عوام کو گھروں میں رہنے کی منادی کی گئی ہے اور کہا گیا ہے کہ اس علاقے میں کرفیو لگا دیا گیا ہے۔
