دہلی کی ایک عدالت نے بدھ کے روز سابق مرکزی وزیر ایم جے اکبر کے ذریعہ صحافی پریہ رمانی کے جنسی استحصال کے الزامات کے خلاف دائر ہتک عزت کیس میں فیصلہ 17 فروری تک ملتوی کردیا ۔
راؤز ایونیو عدالت کے جج رویندر کمار پانڈے نے فیصلے کے اعلان کے بعد تاریخ مؤخر کر دی کیونکہ بدھ کے روز کچھ تحریری گذارشات عدالت میں دیر سے پیش کی گئیں۔
اس سے قبل عدالت نے کیس کی سماعت کے بعد یکم فروری کو اس معاملہ پر فیصلہ محفوظ کرلیا تھا۔
سنہ 2017 میں 'می ٹو مہم' کے دوران رمانی نے الزام لگایا تھا کہ ان کو سنہ 1994 میں انگریزی روزنامہ 'ایشین ایج' میں ملازمت کے انٹرویو کے دوران ایم جے اکبر نے جنسی زیادتی کا نشانہ بنایا تھا۔ رمانی اس وقت 'ایشین ایج' کی ایک رپورٹر ہوا کرتی تھیں۔
رمانی پہلی خاتون صحافی تھیں جن کی جانب سے ایم جے اکبر کے خلاف جنسی استحصال کا الزام لگایا گیا تھا۔ اس کے بعد بہت سی دوسری خواتین نے بھی اسی طرح کے الزامات عائد کئے تھے۔
یہ بھی پڑھیں: بین المذہب شادی پر بالغ خاتون کو فیصلہ لینے کا اختیار: ممبئی ہائی کورٹ
واضح رہے کہ ایم جے اکبر نے اس وقت مرکزی وزیر کے عہدہ سے استعفیٰ دے دیا تھا لیکن انہوں نے اپنے اوپر عائد تمام الزامات کو بھی مسترد کردیا تھا اور عدالت میں ہتک عزت کا مقدمہ بھی دائر کیا تھا۔
